(இ - ள்.) தேன்மகிழ் தெரியலாய் - வண்டுகளானவை மகிழ்ந்து மொய்கின்ற
மாலையை அணிந்தவனே!, நின் திருக்குலம் தெளிப்பவந்த - நின்மேலான குலத்தை
விளங்குமாறு செய்தற்குத் தோன்றிய, பால்மகிழ்ந்தனைய தீஞ்சொல் - பாலின்
இனிமையைப்போல் மகிழ்ச்சியை உண்டாக்குகின்ற இனிய சொல்லையும், பவழவாய் -
பவழம்போற் சிவந்த வாயையும், பரவை அல்குல் - பரந்த அல்குலையும், வான்மகிழ்
மணங்கொள் மேனி - வானுலகத்தாரும் மகிழ்தற்கிடமாகிய மணத்தினைக் கொண்ட
உடலினையும் உடைய, அணங்கினுக்கு உரியகோனை சுயம்பிரபைக்கு உரிய தலைவனை,
கேட்பின் யாவனென்று - வினாவின் யான் மகிழ்ந்து உணர்த்த - யான் மகிழ்ச்சியோடு
விடை கூறுதற்கு, சிறிது இடை அருளுக என்றான் - செவ்வி சிறிது கொடுத்தருள்க என்று
கூறினான் (எ - று.)

தேன் - வண்டு. தெளிப்ப - விளக்க. வான்மகிழ்மணம் - சிறந்த மகிழம்பூ மணமுமாம்.
அணங்கு - சுயம்பிரபை. கோனை - என்றது தலைவனை என்றவாறு.
மேலே சுச்சுதன் தன் கருத்தை விரித்துரைக்கின்றான்.