:: TVU ::

அம்மதிற் புறத்தே அமைந்த யானைகட்டுமிட மாண்பு
39.	இரும்பிடு தொடரின் மாவி னெழுமுதற் பிணித்த யானைக் கரும்பிடு கவள மூட்டும் கம்பலை கலந்த காவின் அரும்பிடை யலர்ந்த போதி னல்லியுண் டரற்று கின்ற சுரும்பொடு துதைந்து தோன்றுஞ் சூழ்மதில் இருக்கை எல்லாம்.
(இ - ள்.) இரும்பிடு தொடரின் - இரும்பினாற் செய்யப்பெற்ற சங்கிலிகளால்; மாவின் எழுமுதல் பிணித்த யானை - மாமரங்களின் நீழலினுள்ள இருப்பெழுக்களிலே கட்டப்பெற்றுள்ள யானைகளுக்கு; கரும்பு இடு கவளம் ஊட்டும் கம்பலை - பாகர் கரும்புகளையும் பிற உணவுத்திரள் களையும் உண்பிக்கின்ற ஒலி; கலந்த காவின் - நிரம்பிய சோலைகளிலே; அரும்பு இடை அலர்ந்த போதின் - அரும்புகளின் இடையிடையே மலர்ந்துள்ள நாள்மலர்களின்; அல்லி - அகவிதழினிடத்துள்ள தேனை; உண்டு அரற்றுகின்ற - குடித்துவிட்டு ஒலிக்கின்ற; சுரும்பொடு துதைந்து - வண்டுகளுடனே நெருங்கி; சூழ்மதில் இருக்கை எல்லாம் தோன்றும் - அந்நகரத்தைச் சூழ்ந்த மதில்களின் இடமெல்லாம் விளங்கும், (எ - று.) கவளம் ஊட்டும் கம்பலை; அரற்றுகின்ற சுரும்பொடு துதைந்து தோன்றும் என்க. எழு முதல் - முளையிடத்தில், எழு-யானை கட்டுந் தறி; முதல் : ஏழனுருபு. கவளம் ஊட்டுங் கம்பலை; யானைகட்குக் கவளம் உண்பிப்பவர் கூறும் குறிப்பு மொழிகள். கா - சோலை. காக்கப் பெறுதலால் பொழிலுக்குண்டாகிய காரணப்பெயர். அல்லி; அகவிதழ், தேனுக்கு இடவாகு பெயர். 'இரும்பிடி' என்றும் பாடம். இருக்கை-மதிலின் இருப்பிடம். மதில்மருங்கே யானைக் கூடம் அமைத்திருத்தலை, “பெருங்கைக் குஞ்சர மடிநிலை இருப்பெழுவமைந்த கன்மதிற் புடைநிலை வாரிகள் பொலிந்து சூழ்ந்தவே“ என்னுஞ் சீவக சிந்தாமணியானும் ( 81 ) உணர்க.
( 4 )