:: TVU ::

காமம் பூத்த காரிகையர்
61.	³காமத்தொத் தலர்ந்தவர் கதிர்த்த கற்பினார் தாமத்தொத் தலர்ந்துதாழ்ந் திருண்ட கூந்தலார் ⁴தூமத்துச் சுடரொளி துளும்பு தோளினார் வாமத்தின் மயங்கிமை மதர்த்த வாட்கணார்.
(இ - ள்.) காமம் தொத்து அலர்ந்தவர் - தம்முள்ளத்தே காமமாகிய பூங்கொத்து அரும்பற மலரப்பெற்றவர்; ஒத்து கதிர்த்த கற்பினார் - ஒளிமிக்க கற்புடையவர்கள்; தாமத்து ஒத்து - மாலைகளுக்கு அமைந்து, அலர்ந்து தாழ்ந்து - விளங்கிப்படிந்து; இருண்ட கூந்தலார் - இருண்டுள்ள கூந்தலையுடையவர்கள்; தூமத்துச் சுடர்ஒளி - கரியபுகையினூடே ஒளிர்கின்ற தீப்போன்று; துளும்பு - கூந்தலினூடுஒளிவிட்டு விளங்கும்; தோளினார் - தோள்களையுடையவர். வாமத்தின் மயங்கி - அழகினோடு கலந்து; மைமதர்த்த - மையுண்டு மதர்க்கும்; வாள்கணார் - வாள்போன்ற கண்ணையுடையவர்கள். (எ - று.) இன்பச் செயலிலே இருபாலாரும் மனம் ஒன்றுபட்டுப் பொருந்தாவழி இன்பம் நிறைவுடையதாக மாட்டாது ஆகலின் “காமத்தொத்து அலர்ந்தவர்“ என்றார். இவ்விரு செய்யுட்களாலும் அவ்வரசியரின் மாண்பு உரைக்கப்பட்டது. கதிர்த்த - ஒளிவிடுகின்ற - கற்பிற்கு ஒளி புகழ். தூமம் - ஈண்டுக் கரும்புகை. அது கூந்தற்குவமை. துளும்புதல் - ஒளி ததும்புதல். மதர்த்த - செருக்கிய.
(26)