யாவராயினும் ஆக, அவர் விரும்பியது யாதானும் ஆக எண்ணிய
எண்ணியாங்கு அருள வல்லது காமதேனு; அது அருள் சுரந்தது பாலியாகலின்
‘தாயைப்போலப் பிள்ளை’ என்றபடி குலவித்தையாயிற்று. ஆகலின், ‘காரணப்
பொருளியல்பு காரியத்துளதாகும்’ என்னும் தருக்க நெறி உறுதி உற்றது.

     மாவுக்கிருக்கும் மணம், கூழுக்கிருக்கும் குணம் என்பதும் நோக்குக.

     வறுமை மிக்க வழியும் வளமலி தொண்டைநாட்டவர் வருந்துதற்குரிய
உடம்பை வருத்தியும் பிறர்க்கு ஈதற்குத் தளரார், அத்தன் மைத்தே ஆகப்
பாலி நதியும் கோடையினும் மணலை அகழ்ந்தும் தெளிந்த நீரை உதவும்.

     பாலி நதியின் நீர் பாலின் சுவையை உடைத்தாயும் ஏனைய தீர்த்தங்கள்
நீரின் சுவையே யாதலையும் கண்டு நம் முன்னோர் இதனைப் பாலியெனப்
பெயர் அமைத்தனர் எனலாம் அப் பாலியின் பெருமையைக் கூற வல்லவர்
ஒருவருமிலர்.

நாட்டு வளம்

கலிநிலைத் துறை

     பாலி நதியின் வளத்தால் அறம், பொருள், இன்பம், வீடென்னும்
பயன்களைச் செய்பவர்களுக்கு இடனாய் விளங்கும் மிகுந்த மேன்மையிற்
பொலிந்தது தொண்டை நாடு.

     காமாட்சியம்மையார் முப்பத்திரண்டு அறங்களும் இறைவன் வழி
நின்று நடத்துதற் கிடனாய்த் திரண்ட புகழ் கொண்டதும் இந்நாடே.