சுந்தரமூர்த்தி நாயனார்க்குப் பிச்சை ஏற்று அவ்வுணவை அளித்த
பெருமான் எழுந்தருளுதற்கிடனாகிய திருக்கச்சூரும், திருவிடைச் சுரமும்,
புண்ணியர் எய்துதற்குரிய திருக்கழுக்குன்ற மலையையும் தன்னுட் கொண்டு
திகழ் குறிஞ்சியின் பெருமையை யாவர் விரித்துரைப்பார்?

பாலை

     கோங்கமரம் பொன் கொடுத்துக் குராமரம் ஈன்ற: பாவையைப் பருத்த
அடியினையுடைய பாதிரி (வேள்வி முன்போல) முன் மணந்து கொள்ள,
வெண்கடப்ப மலரில் திரிகின்ற வண்டு பண் இசைப்ப வலியில்முருங்கை
மலராகிய வெண்பொரியை உளங்கலந்து வீசும் வியப்பினது ஒருபுறம்.

     வன்முருங்கை-வன்மை கெட்டது என்னும் பொருளில் வந்தது.
பாலையில் உள்ள மரங்களைக் கொண்டு திருமண நிகழ்ச்சி சித்திரிக்கிறார். 

     தூதுணம் புறாக்கள். பாலை நிலப்பெண்களின் பேரழகினுக்குப்
பெரிதும் தோற்றோடி (புறங்கண்டு) அடுத்துள்ள சோலையிற் புகுந்து,
குராமரப்பாவைகளை அவர் தம்முடைய குழந்தைகள் உறங்குவனவாகக்
கண்டு கவலை கொண்டு வெளியேறி வெயிலில் நின்று, நிலை கெட்டவர்
போல வருந்தும்.

     நண்பகலாகிய முதற்பொருளும், குரா என்னும் மரமும், தூதுணம்,
புறா என்னும் பறவையுமாகிய கருப்பொருள்களும் வந்தன.

     தலைவியர் மொழியைக் கடந்தும் சேணிடைப்பிரிந்து செல் தலைவர்
பாலை நிலவழிச் செல்வுழி, ஆங்காங்குத் தூதுணம் புறாக்கள் தத்தம்.