திருமேற்றளிப் படலம்

கலி நிலைத்துறை

     குற்றங்களைக் கெடுத்தருளிய செவ்விய நெறி நிற்பிர்! தேனைத்
துளிக்கின்ற மாலையை அணிந்த தேவர் தொழும் அமரேசம் மகிழ்ச்சி
மீதூரக் கூறினோம். உருத்திர கண முதல்வர் அன்பால் தொழுது துதிக்கும்
நூற்றுப் பதினெட்டுத் திருக்கோயில்கள் இவண் எடுத்துக் கூறுவோம்.

     குற்றத்தைப் போக்குகின்ற அமரேசத் தலத்திற்குத் தென் திசைச்
சேணிடை விண் தலத்தினைத் தீண்டுகின்ற அழகிய மதில் சூழ்ந்த காயா
ரோகணத்திற்கு மேற்கில் உருத்திரர் நூற்றுப்பதினெண்மர் போற்றிட நன்மை
கெழுமிய தலங்கள் சிறக்க உள்ளன.

     அண்டத்தைக் காவல் பூண்டு விளங்குகின்ற உருத்திரர் நூற்றுவரும்,
அருளொடு கூடிய சீ கண்ட ருத்திரர் வீரபத்திரர் ஆகியோரும், குரோதர்
முதலிய எண்மரும், மண்டலத் தலைவராகும் எண்மரும் துதித்து முன்னம்
பூசனை இயற்றப்பட்டன ஆகும் அக்கோயில்கள்.

திருமால் சிவசாரூபம் பெற விரும்பல்