அங்ஙனமே புற்றிற்றோன்றி நாணியை அரித்திடும்பொழுது படமுடைய
ஆதிசேடனைப் பாயலாகவுடையவன் சிரம் அறுபட்டு வீழ அந்த இடம்
இந்நிகழ்ச்சியால் சின்னமாகேசவத்தானம் எனப்பெற்றது. செவ்விதாகக்
குறைபடுதலையுடைய சிரோநதி யென்னும் ஆறு அவ்விடத்தோடும்
சிறப்பினது.

திருமால் தலைபெற்ற வரலாறு

மேற்படி வேறு

     அப்பொழுது திருமாலிடத்திருந்தும் அப் புகழை முப்பத்து முக்கோடி
தேவர் எனப் பரவிய தேவர் கைப்பற்றிக்கொண் டுவகையிற் சென்றனர்.
மிகப் பெரிய பூமியில் தங்குகின்ற இருபிறப்பாளராகிய அந்தணர்க்குப்
பொருந்தும் யாக வடிவினனாகிய திருமால் இல்லாமையால் வாட்டமுற்று. 

     இந்திரன் மீளவும் காஞ்சியை அடைந்தனன். உரிய முறையில் வழிபாடு
செய்து பெருக்கிய அன்பின் காரணமாக எமது பெருமான் காட்சி தந்தருளத்
தரிசித்து இசையமைந்த பழைய வேதப்பாடல்களாற் றுதி செய்தனனாய் இதழ்
கொண்ட மலர்களை முடித்த கூந்தலையுடைய இந்திராணியின் புணர்முலைப்
போகங் கொள்ளும் தோள்களையுடைய குரிசிலாகிய இந்திரன் கூறுவான்.

கலி விருத்தம்

     ‘வண்டுகள் ஒலித்திசையை எழுப்பும் அழகிய இதழ்களையுடைய நறிய
கொன்றை மலர் மாலை சூழும் சடைமுடிப் பெருமானே! பெருவன்மையுடைய
வில்லால் யாகவடிவினனாகிய சிறிய மலர்த்துழாய் மாலையோன் தலை
அறுபட்டது.