பகைவரைக் கொல்லும் வலியுடைய தனது கொடுமையைப்
பெருமானார்க்குக் கூறிக் கொல்வித்து இடையூற்றினைச் செய்த தேவர்கள்
இந்நாளில் அழிந்த திறங் கண்டு உவகை மிக்குத் தனது முடியை அசைத்து
அவர்க்குக் கேடு தகும் தகும் எனல் போலக் கங்கையை அணிந்த சடா
முடியில் கொக்கிற கசைந்தாடவும்,

     சிவபிரானாரது திருக்குறிப்பினால் வீரபத்திரர் இயற்றிய தண்டத்தின்
குறைபாட்டினை நிறைவு படுத்த நினைந்து கொடிய விடத்தினை முகந்
தூற்றுவது போல விடமுடைய கீழ்வாயையும், படப் பொறியையும் உடைய
பாப்பணிகள் வாயைத்திறந் தடுத்தடுத்துப் பிளவுபட்ட நாவை நீட்டி
மூசெனும் ஒலியுடன் மூச்செறிந்து நோக்கவும்,

     கூடிய பருந்துகள் சிறகை விரித்துக் கொட்புறு பந்தரையுடைய
போர்க்களத்தின்கண் வாடுகின்ற இமையவர் தம் உயிர்கள் அவரவருடம்
பிடை  உளவோ இலவோ என் றையுற்றுப் பிணங்களைத் தொட்டுப்
பார்க்கும் பொருட்டு இருகரங்களை நீட்டினாற் போல வளைந்த வடிவுடைய
பிறைமதி வெண்ணிறச் செழுங் கதிரைப் பரப்பா நிற்கவும்,

     மதியாதவர் தமக்கே மேலும் இனிய அருளைப் புரிய விரும்பி
எழுந்தருளும் நிலைமையை நோக்கி மனம் தாங்காது வியர்த்துப் பிணங்கிச்
சினந்து மன மெலிந்து வீழ்ந்தெழுந்து புரண்டு கையெறிந்தாலென்ன
நெகுகின்ற சடையினி லுறைகின்ற கங்கை மாது தொடர்ந்து துளும்பி ஆடவும்,

     எழுதல் வீழ்தல் புரளுதல் (திரைக்)கை எறிதல் (வயிற்றிலெற்றுதல்)
கங்கைக்கும் மகளிர்க்கும் இயைந்த செயல்.