மலருறை பிரமன் படைக்கும் வன்மையும், மது என்னும் அசுரனை
அழித்த மதுசூதனன் உலகைக் காக்கும் வன்மையும் விண்ணிலும்
ஒப்பில்லாதவனாகிய இந்திரன் முதலானோர் எண்டிசைக் காவலும்
பொதுவில் நடம்புரியும் பெருமான் பூசனையின் பயனாவன,

     அதுலன்-ஒப்பிலி. ஆசை-திசை, பொது-மன்றம்.

     செல்வமும், ஆண்மையும், அழகும் மிகு புகழும், வாழ்வும்,
இரக்கமும், கல்வியும், பேரழகுடைய வாழ்க்கைத் துணைவியும், இனிய
சொல்வன்மையையும், பழுதற எண்ணலும், பிறவும் இருளும் அஞ்சுங் கரிய
கண்டத்தையுடைய சிவபிரானைப் பூசனை புரிந்ததன் பயனாவன.

     அமராவதியையோ அன்றிச் சத்திய லோகத்தையோ அல்லது
வைகுந்தத்தையோ விரும்பினும், வீட்டினை விரும்பினும் கெடுதலில்லாத
சிவபத்தி ஒன்றனால் அடையற் பாலன.

     போகமும், பரபோகமும், இறைவன் பூசனையால் பெறற்குரியன.

     தோள்வலியை யுடையவனே! பகை நோய், பாம்பு, பேய், கிரகங்கள்
இவற்றெத்திறத்தனவும், மெய்யன்பர்க்குத் துன்பஞ் செய்யா. இடையூறு
நிகழா ஆகலான் சிவபிரான் திருவடித் தொண்டில் முயன்றவர்க்கு யாவும்
எளியன ஆகும்.

அறுசீரடி யாசிரிய விருத்தம்