வாணேசப் படலம்

கலி விருத்தம்

     அறம் திகழ்கின்ற காஞ்சி நகரில் அந்தகேசத்தின் இயல்பினை
அறிந்தபடி சிறிது கூறினோம். இனி, விளங்குகின்ற சிறப்பினையுடைய
அந்தகேசத் திருக்கோயிலுக்குக் கிழக்கில் மாறுபடாத மேருமலையைக்
கோட்டிய வில் வீரர்தம் வாணேசத் தலத்தினைக் கூறுவாம்.

     ‘தருமம் பிறழாத சத்ததானம்’ என முன்னும் வந்தது. அம்மையார்
முப்பத்திரண்டறங்கள் வளர்த்தற்கிடனென்க.

வாணன் வரம்பெறல்

     வலிமையையுடைய வாணன் என்னும் அசுரன் தீவினையைக்
கெடுக்கின்ற காஞ்சிமாநகரில் சிவலிங்கந் தாபித்துப் பூசனையை முற்றுப்
பெறச் செய்து முனிவர்போலப் பெருந்தவத்தை அளவிறந்த காலஞ்
செய்தனன்.

     அரியனாயும் அன்பருக் கெளியனாம் அழகன் அவன் முன்னர்த்
திருநடம்புரியக் கண்ட வாணன் என்பும் குழைய மனம் ஒன்றி உருகித்
துதித்தனன். திரு நந்தி கணங்களொடும் குடமுழவமும் முழக்கினான்.

     ‘அருமையில் எளிய அழகே போற்றி’ (திருவா.)