வேறு

     தறுகண்மையுடைய யானைகளால் எறியப்பட்டு விண்ணிலெழும்
அசுரர் உள்ளங்கையிற் பற்றிய வேலுடன் அணைதலைக் கண்டு வானில்
நெருங்கியுள்ள தேவர் தங்களுக்குத் துன்பம் தரும் பொருட்டு இங்கு
நெருங்கினர் என்றுட்கொண்டு மனம் நடுங்கி வெருண்டோடினர்.

     பகைவரை அழித்துச் சீறுகின்ற படையையுடைய அசுரரால் வானிற்
செல்லும்படி தூக்கி எறியப்பட்ட துன்பம் உடைய யானை பிளிறொலியுடன்
மதநீரொழுகப் பூமியில் வீழ்தல், துன்பப்பட வலன் என்னும் அசுரனை
அழித்த இந்திரன் கட்டளையால் மேகம் சார்ங்கம் என்னும் வில்லையுடைய
திருமாலுக்குத் துணையாய் வருதலை ஒக்கும்.

     வலியுடைய அசுரனொருவன் கோபத்துடன் தூக்கி எறிந்த குதிரை
வானில் எய்திச் சுழலுகின்ற காற்றில் அகப்பட்டுச் சுழலுந் தோற்றம், சூரியன்
செல்லும் விசையினால் வழி விலகிய ஓர் குதிரை மனம் நொந்து
தன்னினத்தைக் காணாது சுற்றித் தேடுதலை ஒக்கும்.

வேறு

     தரையிடைத்துன்னிய இரத்தம், தசை இவற்றால் வழுக்கிவிழுகின்ற
வீரர் முதுகில் மதக்களிறு குத்திய வெண்கோடு உருவி வெளிப்பட்டு மார்பில்
நிமிர்ந்து தோன்றக் கண்ட தேவமகளிர் ஆடவர் கொங்கை பெற்ற தென்னே
என வியப்பொடும் பேசுவர்.