நெருப்பில் காய்ச்சி இயன்ற கழலினை வீக்கிய வீரர் மார்பிடை வேல்
துளைத்த துளைவழியினின்றும் செந்நீர்ப் பெருக்கு இழிதல், யான் பகைவர்
உயிரைப் பருகுவல் என விரைவில் உள்ளே திகழ்கின்ற வீரமாகிய தீ
வெளிப்படுவதனை ஒக்கும்.

     போர்க்களிறு கதாயுதத்தைச் சுழற்றி எறிந்தபோது தேர்க்கொடிஞ்சியிற்
பத்திபடப் பதித்த நன்னிறமுடைய பெருமை பொருந்திய மணிகள் உதிர்தல்
வீரர் உரப்பிவரும் அதிர்ச்சியினால் நீண்ட வானின் நட்சத்திரத் தொகைகள்
நிலத்தில் வீழ்வனவற்றை ஒக்கும்.

     நீண்ட கொடிகளிற் றுணிகள் எவற்றினும் நீண்டு திரண்ட அம்புகள்
செறிதலால் கிழிந்தவையுதிர்ந்து அகன்ற வானிலுள்ள மேகமுழக்கினைப்
போல வீரர்கள் அதட்டொலியால் உயர் விண்ணிலுள்ள ஐந்தருக்களின்
அடி அதிர்தலால் உதிர்ந்த தழைபோலப் பறப்பன.

     கையிலுள்ள படைகளைப் பகைவர்மேல் வீசி உடம்பில் கோப்புண்டு
கிடந்த படையைப் பறித்துப் பகைவர்மேல், கைப்பொருள் முற்றும் இழந்து
வறியராகியபோதும் மானமுடையார் அயலவர் அன்பொடு கொடுக்கும்
பொருளையும் திருப்பி விடுதல் போல விடுப்பார்.

     நூழி லாட்டு: ‘கைவேல் களிற்றொடு போக்கி வருபவன், மெய்வேல்
பறியா நகும்.’