திரண்டகொங்கைமேல் கச்சும் நறுமணப் பொருளும் அணிந்த பாத்தியர்,
‘எம்முடைய அவயவ அழகைக் கொள்ளை கொண்டீர்கள்’ என்று சினந்து
ஒலிக்கும் சங்கு, சேல்மீன், பவளம், வெண்முத்து முதலியவற்றைப் பிறர்
கொள்ள விலைப்படுத்தினமையால் மகிழ்ச்சி மீக்கூர்வர். அம்ம,
வியப்பிடைச்சொல்.

     கண்ணினழகைக் கவர்ந்த மீன்களை உலர்த்து நெய்தல் நில மகளிர்
மீன்களைக் கவரவரும் பறவைகளை ஓட்டும் பாடற் பண்ணைச் செவிமடுப்ப
விரும்பிக் கடலும், சூரியன் விண்வழிச்செல்லும் பகலில் மெல்லென ஒலிக்கும்.

     தம்மிற் பிரிந்துறைகின்ற காதலர் அரிய உயிரை வருத்த விருது கூறித்
தும்பை மலரைச்சூடி மன்மதன் பொருகின்ற காலம் இதுவென எண்ணி அவன்
முரசாகிய கடல் இராப்பொழுதில் மிக்கொலிக்கும்.

     விரும்பிய தலைவர் பிரிந்துறைதலின் கண்கள் நீரைச்சொரிந்து
துன்பத்திலழுந்தி அழுது இரங்கும் தம்மை நோக்கி ஆழ்ந்த கழியாகிய
பெண்ணும் உடன்நின் றழுதல்போலப் பறவைகள் அரற்றத் தேனைச் சிந்தும்
(கண்ணீர் சிந்தும்).

     பெண்ணிற்குப் பெண் இரங்குவதியல்பு என விளக்கும்.

     பொருள்வயிற் பிரிந்து மரக்கலத்திற் சென்ற நெய்தல் நிலத்தலைவர்
வரும் வழிமேல் விழிவைத்து நோக்கிப் புலம்பும் மடந்தையர் இனிய உயிர்
தழைப்பக் குளிர்ந்த மெல்லிய நீர்த்திவலைகளை அலைக்கையால் வீசும் கடல்.