இரேணுகேச்சரப் படலம்

கலி விருத்தம்

     தேனுடன் மணம் உயிர்க்கும் நறிய கொன்றை மலர் மாலையை
அணிந்த சடையினையுடைய பெருமானார் எழுந்தருளியுள்ள பரசிராமேச
வரலாற்றினைக் கூறினோம். இனி அத்தலத்திற்குத் தெற்கே பாலியாற்றின்
கரையில் சோலை சூழ்ந்த இரேணு கேச்சரத்தைப் போற்றிக் கூறுவோம்.

இரேணுகை மனங்கலங்கல்

     பெண்யானையின் நடையினை ஒக்கும் நடையினையுடைய
உமையம்மையார்க்குக் கணவர்தம் மெய் யன்பருடைய திருவடித் துகளைக்
கவசமாக மெய்யிற்றாங்கி எதிர்ந்த மன்னவர் வலி அழிய வென்ற பரசிராமன்
விரும்புகின்ற அவனுக்குத் தாயாகிய இரேணுகை எனப்படுவாள் அழகின்
வரையறையில் நின்றவள்.

     கல்வியை ஆராய்ந்துணரும் இயல்பினையுடைய வருமவேந்தனார்
போற்றிய வரத்தின் பயனாக வந்த மெல்லிய இயல்பினையுடையாள்
சமதக்கினி முனிவர்க்கு வாழ்க்கைத் துணைவியாய் மெய்க்கற்பினின்
விளங்கும் மேன்மையள் ஆயினள்.