மகனால் இழந்த உயிரை மீளப்பெற்ற மாட்சிமை யுடைய இரேணுகை
நலமிக்க கணவனை இழந்த துன்பத்துடன் தன் மகன் எண்ணுதற்கரிய
சிறப்பினை வரமாகப் பெற்றதனை மனங்கொண்டு அவன் கருத்தின் வழியே
குறித்த இடத்தை அடைந்தனள்.

     வண்டுகள் குழாமாக ஒலித்துச்சூழ்கின்ற வளமுடைய சோலைகள்
பரவியுள்ள காஞ்சிபுரத்தினை அடுத்துத் தன்மகனார் மனம்பொருந்தி வழிபாடு
செய்த பரசிராமேசத்தின் அயலே விளங்குகின்ற ஒளியினையுடைய சிவலிங்க
மூர்த்தியை நூன்முறைப்படி நிறுவினாள்.

     தாய் தன் மகவினிடத்து வைக்கும் பேரன்பினது மாண்புடைமையை
ஒப்பப் பேரன்பு வைத்துப் பூசனையை ஒழியாது பன்னாள் மனம் பொருந்தப்
புரிந்து வருநாள் கருணை கூர்ந்து நம்பி அடையத்தக்க பெருமானார்
மலையரையன் மகளாராகிய இளைய பெண் யானையை ஒப்பாருடன்
ஆங்கெதிரே திருக்காட்சி தந்தார்.

     நுண்ணிய இடையினையுடைய இரேணுகை நோக்கி எழுகின்ற
விருப்பினால் உள்ளம் உருகிக் கையாற் றொழுது அழகிய மெல்லிய
குரலினையுடைய குயிலினங்கள் நாணும்படி வாயைத்திறந்து இனிய
இசைப்பாக்களால் பெருமானாரைத் துதி செய்து நின்று கூறத் தொடங்கினாள்.

     ‘‘ஏனையோரிடத்து கூறத்தகாதனவும் குற்றமறுக்கும் இருமுது
குரவராகிய தாய் தந்தையரிடத்தே மேன்மை பொருந்திய நாணத்தைக்