மேற்கொள் சமணரால் கல்லுடன் பிணித்து கடலில் அமிழ்த்தப் பெற்றும்
எங்கள் திருநாவுக்கரசர் பெருமானார் அஞ்செழுத்தின் துணையால்
மேலெழுந்து விளங்குதலை ஒக்கும்.

     குளிர்-தங்கிய. கார் அமணர்-இருண்ட அறிவினையுடையவர். முருடு-
வன்மை. ‘வன்பராய் முருடு ஒக்கும் என் சிந்தை’ (திருவா) இருப்பை முதலிய
மரங்களில் காணப்பெறும் முடிச்சு. இங்குத் திருநாவுக்கரசர் தம் கருணை
வடிவம் கண்டும் தீங்கிழைக்கும் திண்மை.

யானைக் கூடம்

கலி விருத்தம்

     களிறு, பனையை ஒத்த துதிக்கையால் நீரைப் பருகி நிறைந்த நீர்
நிலையைக் குறைபடுத்தும்; இனி, மதநீர் பெருக்கிக் குறைந்த நீர் நிலையை
நிறைபடுத்தும். இவ்வாறு மாறி மாறி நிறைந்தும், குறைந்தும் காணப்பெறும்
கோட்பாட்டினை உடைத்து அத்தடம்.

     ஒருத்தல்-யானைத் தலைவன் (கலி-46: 3, நச்) குறை தடம், நிறை தடம்
என்பன, இடத்து நிகழ் பொருளின் தொழில் இடத்தின்மேல் ஏற்றப்பட்டது.

     யானைக் குலத் தலைவர்கள் தம் குழாத் தொடும் தங்குகின்ற
காட்டினைத் தம் அரசனது பகைவர்க்காக்கி, அவர் அரசு செய்கின்ற
நாட்டிடத்தைத் தாம் சுற்றத்தொடும் கைக்கொண்டு இங்ஙனம் மாற்றிக்
கொண்டு மாறி, மாறித் திரிகின்ற யானை செல்லும் வழிகள் அளவில்லன
உள்ளன.

     தண்டம்-யானை செல்வழிகள். பரிவருத்தனை-மாற்றிக் கொள்ளல்.

     போர்த் தொழிலையும், மதப்பெருக்கமைந்த காதுகளையும் உடைய
யானைகள் தம்மேல் நீரைச் சொரிகின்ற கரிய மேகங்களிடத்துப் பகை
கொண்டு எதிர்செல உட்டுளை பொருந்திய துதிக்கையால் நிரம்ப நீரை
முகந்து விண்ணிடத்து வீசா நின்றன.