இரவில் செயற்படும் கோட்டான் முதலிய பறவைகளும், கொடுமைமிக்க
புலி முதலிய விலங்குகளும் தேன்மணங் கமழும் செவ்வல்லி மலரும்,
நிலவைப் பருகும் சகோரப் பறவையும், முறையே இரவில் புடை
பெயரமாட்டாத காக்கைகளையும், குரங்கினங்களையும், தாமரை மலர்களையும்,
சக்கரவாகப் பறவைகளையும் ஒத்தன.

     உலகையும், அதனிடைப் பொருள்களையும், தத்தம் உடம்பின்
இயல்புகளையும் உலகோர் காணாராய் இருளொன்றையே கண்டனர். இரவு
பகலில்லாத ஒளியுடைய விண்ணுலகோரும் கண்டறியாத இருளையே
நீக்கமின்றிக் கண்டனர்.

     ஒழிந்தது சிருட்டி. அழிந்தன வேள்விகள். ஓட்டெடுத்தன தவமும்
தானமும். ஓடி ஒழிந்தன திருக்கோயில் வழிபாடுகள். கைவிடப்பட்டன
சிற்றின்ப நிகழ்ச்சிகள். தொலைந்தன ஆராய்ச்சிகள். நினைவினின்றும்
நீங்கின கேள்விச் செல்வம். மருண்டன உலகங்கள் யாவும்.

இறைவி கைநீப்ப இறைவன் கண்திறத்தல்

     தேவரும், முனிவரும், மக்களும் பரவிய பேரிருளில் மூழ்கி அந்தோ
என் றரற்றி நடுங்கிக் கடலொலி வெள்கும்படி முறையிட்டரற்றும்பொழுது
உமையம்மையார் கண்களைப் புதைத்த கைகளை எடுக்கக், கண்
திறந்தருளினர் முதல்வர்.

     ஒளிகள் எவ்விடத்தும் குடிகொண்டன. இருட் பெருக்கம் சுருங்கியது.
படைத்தலும் காத்தலும் ஆகிய தொழில்கள் நன்கு