கலிநிலைத் துறை

     ஒளிவிடும் அணிகளையும், சாயாத கொங்கைகளையும், மணங்கமழும்
மலரணிந்த கூந்தலையும் உடையோய்!  பாவங்களைச் செய்து பின்
அஞ்சுபவர்க்குப் பொருந்திய தீர்வுகளை நல்லற நூல்களில் பெருந்தவர்
வலியுறுத்தி உள்ளனர். அவையாவும் மிகவும் சிறுமையை யுடையன.
அவற்றை மனங்கொள்.

     எத்துணை வலிமையுடைய பாவத்தையும் முழுதும் போக்கும்
சிறப்பினையுடைய பிராயச்சித்தம் யாவை எனிற் கூறுவோம். எம்மை
அன்போடும் அருச்சனை செய்தலும், மனம் ஒன்றித் தியானித்தலும்,
துதி செய்தலும், திருநாமத்தைக் கணித்தலும், மெய்யன்பொடும் மாகேசுவர
பூசனை  புரிதலும் ஆகும்.

     பாவையே! சிறப்புமிக்க விடியல் முதலிய ஆறு காலங்களும் குற்றமற்ற
காலங்கள் எனப்படும். யாம் விரும்பியுறையும் இடங்களும், எம்மைக் கூடிய
மெய்யன்பர்கள் உறையும் இருக்கைகளும் அத்தகு சிறப்புடையன என
அறிவாயாக.

     ஆகலின், யாம் உறையும் இடங்களி லாயினும் அன்றி மெய்யடியார்
மேவும் தலங்களி லாயினும் பேரன்பொடும் எம்மை அருச்சனை செய்.
அதனைக் கண்டு விண்ணவரும் மண்ணவரும் கடைப்பிடித்து உய்வர் என
அருளினர்.