சிறிய செயல் என்று எண்ணுதல் கூடாது. ஆராய்ந்தால் உன்னை ஒப்பவர்
மற்றொருவர் மூவுலகினும் இல்லை.

     வருத்தம் தவிர்தி. வெள்ளிய விடைப் பெருமானார்க்கு உவப்புறுத்திக்
காசியினும் மேம்பாடு நிரம்பிய விளக்கம் அமைந்த நகரம் அங்குள்ளது.
மொய்க்கின்ற இளவண்டுகள் பாய அரும்புகள் உடைந்து ஊற்றுந் தேன்
மணம் வீசும் மெல்லிய மலர்களையுடைய பொலிவுள்ள நீர்நிலைகளும்
வளமுடைய வயல்களும் சூழ்ந்த காஞ்சி என்னும் தொன்னகரம் அதுவாகும்.

     காசியில் இறந்தால் சிவபிரானார் திருவுருப்பெறுதலாகிய சாரூப
முத்திவாய்க்கும். யாண்டிருந்தும் காஞ்சியை நினைத்த அளவே திருவடி
கலத்தலாகிய சாயுச்சிய முத்தி கிட்டும்.

     அக்காஞ்சியின் பெருமை முற்றும் நெருப்புப்போலும் சுடர்விடும்
சடையிற் கங்கையைத் தரித்தவரே அறிவர் அன்றிப் பிறர் எவர் அறிய
வல்லார்; ஒருவருமிலர். உத்தம குணமுடையாய்! சித்திகள் யாவும் வழங்கும்
அங்குச் செல்வையானால் மேலும் பெருநன்மைகள் பல உனக்குள்ளன
ஆகும்.

     பிணிக்கின்ற விடமுடைய வாசுகியைக் கயிறாகச் சுற்றிப் பாற்கடலைக்
கடைந்து பெற்ற அமுதத்தைத் தேவர்க்கு நுகர்விக்கும் திருமாலைப் போலத்
திருவேகம்பத்தில் விரும்பி வீற்றிருக்கின்ற மூக்காகிய குமிழம் பூவினையைும்,
மான்மறிபோலும் விழியினையும் உடைய