கண்ட தேவர் யாவரும், கொங்கை மறைந்தமை கேட்டு அம்மையைப் பயந்த
காஞ்சனமாலை மகிழ்ந்தமையினும் நான்கு மடங்கு மகிழ்ந்தனர்.

     பொன்-காஞ்சனம், திருவிளையாடலுள் தடாதகைப் பிராட்டியார் திரு
அவதாரப் படலத்துள் காண்க. முயலாமே அடங்கியமை: ‘பெரியார்முன்
தன்னைப் புகழ்ந்துரைத்த பேதை, தரியா துயர்வகன்று தாழும்-தெரியாய்கொல்,
பொன்னுயர்வு தீர்த்த புணர்முலையாய் விந்தமலை, தன்னுயர்வு தீர்ந்தன்று
தாழ்ந்து’ என்புழிக் காண்க,.

அகத்தியர் காஞ்சியை அடைதல்

     மலையிடை முட்டிக்கொண்டு மனஞ் சுழலும் குருவியைப் போலத்
தடைப்பட்டு வருந்தி நின்ற சூரியன் முதலோரைச் செல்வழிச் செல்லவிடுத்துத்
தவவேந்தராகிய முனிவர் தம் வாழ்க்கைத் துணைவியோடும் மணங்கமழும்
சோலை சூழ்ந்த காஞ்சி என்னும் வளநகரத்தை எதிர்கண்டனர்.

     கண்டு கைகூப்பி வீழ்ந்து வணங்கி எழுந்து இருகைகளும் முடிமேற்
குவியச் செறிந்த பேரன்பொடும் புகுந்து விதிப்படி செயத்தகு கடன்களை
முடித்துக் கொண்டு தேவ தேவர் திருக்கோயில்கள் யாவற்றையும் முறையாலே
வணங்கிப் பழ மறைகள் எடுத்தேத்தும் பரவுகின்ற ஒளியுடைய
திருவேகம்பத்தைச் சார்ந்தனர்.

     வளமிக்க அழகிய திருவாயிலினை அணுகிப் புகுந்து அவ்விடத்தே
திருநீலகண்டர் திருவருளை ஒப்ப நிரம்பிய புகழ் வளர்ந்த சிறப்பினை
யுடைய சிவகங்கை என்னும் தூய நறிய தெளிந்த நீரில் மூழ்கி விளக்கம்
அமைந்த அக்க வடமும், திருவெண்ணீறும், திருமேனியில் அணியும்
இடங்களில் விளங்க அணிந்தனர்.