எமது பெருமானே! சிறந்த இத்தமிழ்ச் சொல்லால் ஆகிய மந்திரங்களை
அடியேன் குறித்தோதிச் செவ்விய நெறியினின்றும் பிறழவிடாத இத்திருக்
காஞ்சி நகர எல்லையில் உனக் கருகிருக்கும் தொண்டனாய் இனிதிருக்கவும்
அருள வேண்டும். இவ் வரங்களை எனக்கு வழங்குவாய்’ என்றிரந்தனர்.

     குவித்த கரத்தினராய அகத்தியர்க்குப் பெருமானார் அருளுற்றுத்
தமிழ் இலக்கணத்தை விரிக்கும் ஆசிரியத் தன்மையின் முதன்மையையும்,
உயர்ச்சி மிகு தென் திசைக்குத் தலைமையையும் வழங்கி விரும்பிய பிறவும்
பொருந்திய வகையினால் நல்கி அகத்திய லிங்கத்தே மறைந்தருளினர்.

     இவ்வாறு பேறு பெற்ற பெருந்தவரும் தமிழ் நாட்டில் இனிய தமிழ்
இலக்கணத்தை எழுத்து வடிவில் இயல் முறையால் தெளிவுறுத்திச் செம்மேனி
எம்மானார் திருவடிகளை முற்கூறிய முறையில் தொழுது பரசி நீண்ட காலம்
அங்கிருந்தனர்.

     வடமொழியைப் பாணினி முனிவர்க்கு வகைப்படுத்தி அருளி அதற்கு
ஒப்பவே செய்யுளுக் கமைந்த தென் மொழியாகிய தமிழை உலகோர் யாவருந்
தொழுது துதிக்கும் அகத்தியர்க்குத் தெளிய வுணர்த்தினர் விடையூரும்
விமல ரென்றால் கடல் சூழ் நிலவுலகில் தமிழினது பெருமையை யாவரே
அளவு படுத்தி அறிய வல்லார்,

     வடமொழி தென்மொழி ஆகிய இரு மொழிக்கும் சிவபெருமானாரே
முதல் ஆசிரியரெனின், நல்லியல்பு தோன்ற இருமொழியையும் வழக்கு
வழிப்படுத்தார் முனிவரசரே எனின், புகழை விரிக்கும்