என்றருளி மந்தர மலையில் எழுந்தருளும் எமது பெருமானார்
விடுத்தலால் தெளிவுற இந்நகரை அடைந்தேன். சேடிகாள்! மாறுபடாது
நின்று வேண்டும் உபகரணங்களை வருவித்துத் தாருங்கள்’ என்று
இயல்பாகப் பாசங்களின் நீங்கிய விமலை கூறினர்.

     கூறிய திருவாக்கைக் கேட்டு மனம் களிப்புமிக்கு ஏலவார் குழலியார்தம்
மெல்லிய மலரடிகளைத் தொழு தெழுந்து அலைகளையுடைய பாற்கடலில்
பிறந்த அமிழ்தம் போல்வாய்! அவரவர் செயத்தகும் பணியைச் சிவந்த
இதழினையுடைய திருவாய்மலர்ந்து அருளுக’ என, அருள் செய்வார்,

அம்மையார் தோழியர்களுக்குப் பணித்தல்

அறுசீரடி யாசிரிய விருத்தம்

     ஆறு காலங்களிலும் யான் நீராடிக் கடன்களை முடித்தற்கு
நல்லொழுக்கமுடைய தேவரும் விரும்பத்தக்க இனிய நீர்க்கிணறு ஒன்றும்,
விடத்தை அணிந்த பெருமானார்க்குத் திருமுழுக் காட்டுதற்குக்
கிணறொன்றும்மயிர்ச்சாந்து பூசிக் கருமைமிகும் நெய்ப்புடைய கூந்தலீர்
சிலர்தொடுமின்,

     திரைக்கரங்கள் முத்துக்களை முகந் தெறியும் நதிக்கரையின் அயலே
மலர்கள், பச்சிலைகள், பழங்களின் பொருட்டுப் பல்கிய இருவாட்சி, வில்வம்,
பலாமரம் முதலான பலவும் கெழுமிய நந்தவனங்களை வெற்றிலைபோலும்
முகமுடையபொற்பூணினையுடையீர் சிலர் ஆக்குமின்.