நறுமணமுடைய சந்தனக்குழம்பும், மணம்கமழும் கத்தூரிச் சாந்தும்,
மணம் கெழுமிய கருப்பூரமும், மணம் விம்மும் குங்குமப் பூவும், பிறவும்,
விலை மதித்தற்கரிய மொய்யொளியுடைய தெய்வமணி கொடு குயிற்றிய
அணிகளும், திரு ஆடையும் முதலிய சிலர் சிலர் கொண்டு வாருங்கள்.

     பஞ்ச கௌவியமும், பஞ்சாமிர்தமும், சிலர் சிலர் தாருங்கள், தேன்
கலந்த திருவமுது முதலிய சிலர் பதம் செய்ம்மின், வானைத்தோய நின்ற
கோயில், திருமாளிகை முதற் பிறவிடங்களிலும், மணிகளாலும், வாசனை
பொருந்திய மலர்களாலும், பட்டாலும் அழகுற விதான முதலிய அமைமின்.

தோழிமார் தொண்டு

     இங்ஙனம் இமயத்தின் இளைய பெண் யானையை ஒப்பவர் ஏவிய
உடனே தோழியர் யாவரும் விரைவு தோன்றத் திருவடிகளைத்தொழுது
முன்னர் யாம் முடிப்பேம் முடிப்பேம் என்றங்கே ஒருவரினும் ஒருவர் முன்
முன் என முடுகிச் செறிந்த காதலால் முற்பட்டுத் தொழிலில் தலை நின்றனர்.

     பகைவரை அழிக்கின்ற வேல் போலும் கண்களையுடைய
உமாபத்திரை, கீர்த்தி மதி என்னும் இருமாதர் முறையே வடக்கிலும்,
தெற்கிலும் தத்தம் பெயரால் கிணறகழ்ந்து அம்மையார் மூழ்குதற்கும்,
இறைவர்க்கு ஆட்டுதற்கும் முறையே கங்கை யமுனை நீரை அவற்றில்
நிரப்பினர். அவ்விரு தீர்த்தங்களின் மூழ்கினோர் துன்பத்தைத் தரும்
பிறவி நோயைக் கெடுப்பார்.