மிக நீண்ட சடை முடியையுடைய திருவேகம்பர்க்குப் பொருந்திய
திருவமுது அமைக்க அக்கினி திசையில் நீலமணியை ஒக்கும் நீருடைய
கிணற்றை அகழ்ந்து பேரழகமைந்த திருமடைப் பள்ளியைச் சிலர் வகுத்தனர்.

     பிறையையும், எருக்கம்பூவையும் அணிந்த திருமுடியில் சாத்துதற்கு
மேற்றிசையில் விளங்கும் வேகவதி நதிக் கரை மருங்கில் குற்றமற்ற
நல்லிடத்தே பலரும் தொழுகின்ற மேம்பாடமைந்த அம்பிகாவனம்
எனப்படும் மலர்கள் நிரம்பிய நந்தவனங்களைத் தோற்றுவித்தனர் சிலர்.

     நீண்ட இலைகளையுடைய வாழைமரம், பலவும், நெருப்பனைய
பழுக்காய்களைக் கொண்ட பாக்கு மரம் பலவும், சாற்றினை ஊற்றும்
கரும்பு பலவும் தூண்களில் கட்டி ஒளி விடுகின்ற முத்து மாலைகளைத்
தொங்கவிட்டுத் தேன் மணம் கமழும் மலர்மாலைகளை நாலவிட்டு
நிறமுடைய மேற்கட்டி விரித்து யாத்து மணிகள் பதித்த திருக்கோயில்களை
அழகு செய்தனர் சிலர்.

     வளமும், வாசமும் உடைய புனுகைப் பூசி நிறமுடைய மலர்த்
தாதுகளை ஒற்றி நறிய பன்னீரைத் துளித்து அகில் முதலாம் நறும்
புகையைச் சேர்த்தி நவமணியையும் பொன்னையும் இடித்துக்குழைத்து
அழகிய திருமாளிகைச் சுற்றில் உள்ள நாற்றிசைச் சுவர்களிலும் சித்திரம்
தீட்டினர் சிலர்.