உலக முழுவதும் பரந்து மணம் கமழும் சந்தனக் குழம்பில் புழுகினைப்
பெய்து நுண்ணிதாகப் பொடி படுத்திய கருப்பூரத்தைச்சேர்த்து வளவிய
குங்குமப்பூவைக் கூட்டிக் கலவையாகுமாறு தேய்த்துச் சேமித்த குழம்பை
அமைத்த பொற்குடங்களைச் சுமந்து விரைந்து வந்தனர் ஒரு சாரார்.

     கண்ணாடியும், சாமரையும், வெண்குடையும், காற்றை வழங்குகின்ற
ஆலவட்டமும், புண்ணிய வடிவாகிய திருநீறும், கருப்பூரமும், புகை மிக்க
குங்கலியமும், குடமும், தட்டமும் தீபாராதனைக்கு வேண்டும் பிற
உபகரணங்களும் தொகுத்தனர் ஒரு சாரார்.

     தாமரைத் தண்டின் நூலும் நெய்யும் கூடிய விளக்குகள் எண்ணிலவும்,
படம் விரிக்கும் பாம்புகள் அளித்த மாணிக்க விளக்குகள் எண்ணிலவும்,
தேவர் தொகையில் அமைந்த தீபங்கள் எண்ணிலவும், இனிய நறும்புகைத்
தொகைகள் எண்ணிலவும் கைசெய்து (பண்ணி) எங்கும் விளங்கச் செய்தனர்
ஒரு சாரார்.

     மாடகம், பத்தர் முதலிய உறுப்புக்கள் கூடிய யாழைச் சுருதி கூட்டிப்
பாடற்குரிய பாடலை ஒன்றப் பண்ணுமின் எனவும், ஒப்பற்ற பலப்பல
இயங்களில் இசைகளை எழுப்புமின் எனவும், அவற்றிற்குத் தக நடமிடுமின்
எனவும் தெய்வமகளிரை ஏவுவோருமாவர். ஒரு சாரார்.