அம்மையார் வழிபாடு செய்ய எழுந்தருளல்

கலி விருத்தம்

     இங்ஙனம் எல்லாத் தொண்டுகளையும் சேடிமார் செய்ய ஒளி விளங்கு
மணி மாலையைச் சுமக்கும் கன்னி வடிவில் திகழும் அம்மையார் மகா
மண்டபத்தினின்றும் காதலுடன் பெருமையுடைய உமாபத்திரக் கிணற்றை
நீராட நண்ணினர்.

     சிவபெருமானார் திருவடிகளை நினைந்து நீராட்டு விதிப்படி நீராடி
இடை முரியும் கொல்லோ என்னும் சிற்றிடைப் பாங்கிமார் கொடுத்த
ஒற்றாடையினால் திருமேனி ஈரத்தைப் போக்கிக் கொண்டனர்.

     அம்மையார் ஒளியுடைய பட்டாடை இரண்டினை உடுத்துத் தீய
வினையாகிய குற்றத்தைப் போக்கி அருள் செய்யும் திருநீற்றினை மேனி
முற்றும் பூசி நீரிற் குழைத்துத் திரிபுண்டரமாக அணிந்து உருத்திராக்கத்தை
விருப்பொடும் தரித்து அனுட்டானம் செய்து கொண்டு,

     சிவபூசனையைப் புரியும் விருப்பினால் வேண்டும் உபகரணங்களைக்
கொண்டு மெல்லியலார் தோழிமார் உடன் வர இரண்டாம் ஆவரணத்தினை
அணுகினர்.