சங்குகளும், ஊது கொம்பு, தாரை, காகளம், சின்னம், குழல், வங்கியம்
என்னும் துளைக்கருவிகளும், வீணையாகிய நரம்புக் கருவியும், பேரிகை,
முரசு, தம்பட்டம் என்னும் தோற்கருவிகளும் கடல் மடை திறந்தா லொப்ப
முழங்கவும்,

     தேவசாதியினர் இவர் பாடவும், மகளிர் எதிர் எதிர் கலந்து ஆடவும்,
நெருங்கிய முனிவரரும் தெளிந்த அந்தணர் எவரும் வேதங்களை
எடுத்தோதிச் சூழவும்,

     பஞ்சப் பிரம மந்திரங்களும், சடங்க மந்திரங்களும் அடங்கிய
பிரணவத்தை ஓர் துதிக்கை வளர் முகமாகவுடைய யானைமுகக்
கடவுளும், கடப்ப மலர் மாலையை அணிந்த முருகப் பெருமானாரும்
எழுந்தருளியிருக்கும் இருக்கையை வலம் வந்து அடைந்தனர்.

     மூத்த பிள்ளையாரைத் தென்மேற்காகிய நிருதி திக்கினும், இளைய
பிள்ளையாரை வடமேற்காகிய வாயு திக்கினும், மிகு பூசனையால்
மகிழ்வுறுத்திப் போய் மங்கல குணங்களையுடைய நந்திபிரானா ருறையும்
திருவாயிலை நணுகி,

     துவார பாலகர் பூசனையை முடித்துச் சென்று வேத மாமரத்தின்
நீழலில் வாழ்கின்ற திருவேகம்ப நாதரைக் கண்களிப்பக் கண்டபொழுதே
மிக்குயர்ந்த பெரு விருப்பினால் வணங்கி எழுந்தனர்.