ஐம்பொறி வழிச் செல்லாது ஒன்றுபட்ட உள்ளத்தினால்
அஞ்செழுத்தையும் ஓதிக் கரிய கூந்தற் றொகுதிமேற் கூம்பிய கரத்தொடும்
துள்ளிய பெருங்களிப்பொடும் உள்ளே புகுந்து அருகணைய விதித்தபடி
வணங்கி வணங்கித் துதித்தனர்.

     வாசனை விரியும் மலர்களைக் கொண்ட மாவின் அடியில்
வெளிப்பட்ட இனிய சுவையுடைய திருவருளைச் செய்யும் அமுதாகிய
பெருமானாரைக் கண்களால் நிரம்பப் பருகினர், பலமுறை போற்றி
அண்ணலார் திருவருளையே உளங்கொண்டு களிப்பி லழுந்தினர்.

     கண்கள் ஆனந்த வெள்ளத்தை மெய்ம்முழுதும் பொழியுமாறு
திருவுள்ளம் நெகிழ்ந்து உருகினர்; புளகம் மூடினர்; நாக்குழறினர்; அறிவின்
முதிர்ந்த பணியாகிய பூசனையைத் தொடங்கலுற்றனர்.

அம்மையார் வழிபாடு செய்தல்

அறுசீரடி யாசிரிய விருத்தம்

     பிறையை முடித்த பெருந்தகையே! குற்றமற்ற படைப்பு முதலிய
தொழில்கள் தடைப்படத் திருக்கண்களைப் புதைத்தமையால் ஆகிய
கொடிய தீவினையைப் போக்க நின் பூசனையை இப்பொழுது மேற்கொண்டு
திருவருளை முன்னிட்டுச் செய்வேன். இடையூறகற்றி முழுதும் அருளை
வழங்கி முன்னின்று பூசனையை ஏற்றுக் கொள்ளுதி,