கருப்பஞ் சாற்றினையும், பல்பழத் தொகைகளையும், வளர்ந்து
கொண்டே வரும் அன்பினால் தேய்த்துச் சேர்த்த சந்தனச் சேற்றினையும்
திருமுழுக்காட்டிக் கீர்த்தி மதி உண்டாக்கிய கிணற்றுத் தெண்ணீரில் மணம்
ஊட்டிச் சீருத்திர மந்திரங்களை ஓதி அதனை விதிப்படி நிரம்ப ஆட்டி,

     நுண்ணிய நூலானாய துகிலை ஏந்தி மெத்தெனத் திருமேனி ஈரத்தை
ஒற்றிப் புலர்த்தி, விரும்பத் தக்க நல்ல பட்டாடையும், அழகு விளங்கு
முப்புரி நூலும் அணிந்து, கத்தூரியும், கருப்பூரமும் விரவிய சந்தனக்
குழம்பையும் மட்டித்து, இழைத்த அணித் தொகைகளையும் பிற தேனுடைய
மலர் மாலைகளையும் சாத்தி,

     நறுமணத் தூபம் தீபம் இவற்றைக் காட்டி, நால்வகையும் அறுசுவையும்
உடைய உண்டிகளை நிவேதித்துக், குளிர்ந்த நீரால் அருக்கிய பாத்திய
ஆசமனம் அளித்துப் பாகடை (தாம்பூலம்) கொடுத்துத் தக்கோலம், சாதிக்காய்
முதலிய மந்திரத் தொடும் வழங்கி,

     தூப தீபம் காட்டி ஆலத்தி நீர் சுழற்றிப் பலமுறை வலம் வந்து
வணங்கித் துதித்து நீக்கமில் அஞ்செழுத்தையும் கணித்து இவை ஒப்பன
பிறவும் செய்து அரும்பிய பேரன்பினொடும் விரிந்த பூசனையை
முற்றுவித்தனர்.