அந்தப் புரத்தில் வேண்டும் எல்லாப் பொருள்களையும் கொண்டு
சென்று பவழத்தாலியன்ற நீண்ட பலகைமிசை அனைத்துலகையும் பயந்தும்
துவளுகின்ற இடையையுடைய கன்னியாகத் தூய அழகு முதிர்ந்த
விருப்புடைய அம்மையை நன்கிருத்திக் கூந்தலை அவிழ்த்து நெய்யை
முகந்து பூசி,

     நுண்ணிதின் தேய்த்த நெல்லிக் குழம்பும், மஞ்சட் குழம்பும் மெய்யில்
நிறையப் பூசி மிக்க பேரன்பு மேன்மேல் மிக வாசனைப் பண்டங்களும்
துவருடைப் பொருள்களும், பிறவுமாம் நல்லனவற்றை விரும்பப் பூசி நறிய
மணங்கமழும் தூய நீரைத் திருமுழுக்காட்டி ஒளியை எறிக்கின்ற
காதணியுடைய அம்மையாரின் திருமேனி ஈரத்தை வற்றுமாறு ஒற்றி,

     அரும்புகள் மலர்கின்ற கற்பக விருட்சம் நல்கிய பட்டாடையை
உடுத்தி, அழகிய மணியாசனத்தில் இருத்திப் பகைவர் அஞ்சுமாறு சீறும்
வெறுக்கின்ற மதத்தால் களிப்புடைய சிறந்த களிற்றினது பெரிய வெள்ளிய
தந்தச் சீப்பினால் நீண்ட கூந்தலை ஒழுங்குபடச்சீவி.

     மணம் கமழும் மயிர்ச் சாந்து பூசிக் கத்தூரி, அகில், சந்தனம்
முதலியவற்றைச் செறியப் புகையாக்கிய புகையை மணம் கமழக் கூந்தற்கு
ஊட்டி அழகிய பொன்னா லியன்ற மகரமீனினது வாய் வடிவாகச்
செய்யப்பட்ட அணிகலத்தைத் தங்கப் பண்ணிப் பனையினது கனிந்த கரிய
பழத்தை ஒப்ப உச்சிக் கொண்டையை முடித்து அதனைப் பசிய பொன்னாற்
செய்த நீண்ட கயிற்றால் கட்டி,