அனைத்திற்கும் குடி புகும் இடமாய்ப் புறந்தோலால் மறைக்கப்படும்
மிக்கிழிந்த உடம்பே உயிரை வருத்தப் படுத்திடும். வேறோர் நோய் மிகை;
இல்லையுமாம்.

     பிறப்பினை அஞ்சப்பெற்றவரே தீரா நோயாகிய இப் பிறவி நோயைத்
தீர்க்கும் வயித்தியநாதன் தனக்குப் பிறப்பில்லாத முதற்பொருளான
முக்கண்களை யுடைய பரமனே என்று தெளிந்து வலிமை மிக்க விடையை
உடைய பெருமான் அகோர முகத்தை அடைக்கலம் அடைந்து விரும்பி
வீட்டினைப் பெறுதற்குப் பக்குவராவர்.

கலிநிலைத் துறை

     பிற தெய்வங்களைத் தொழாது மாவடியில் வீற்றிருக்கும் தொகுதி
கொண்ட சிவந்த சடைப்பெருமானார் திருவடிகளே புகலிடம் எனத்
துணிவு கொண்டு சாதல் வாழ்தல் இவற்றுள் ஒன்றை விரும்பியும் ஒன்றனை
வெறுத்தும் திரிவுபடாது ஒரு தன்மையராய் எக்காலத்தும் சமநிலை
பெற்றொழுகுதலே துறந்தவர்க்கு முறையாகும்.

     பொறுமை, கல்வி, தூய்மை, ஐம்பொறி, அடக்கல், அடக்கம், உறுதி,
நாணம், சினமின்மை, கள்ளாமை, விபூதி, சிவசின்னம், சிவபூசனை, தியானம்
ஆகிய இப்பதினான்கும் நல்லற நெறி நிற்போர்க்குப் பொருந்திய
இலக்கணங்களாகும்.