மந்தார மலரில் இந்திரனும், பொலிவுடைய ஊமத்தம் பூவில்
குபேரனும், நாயுருவில் இயமனும் விரும்பி உறைவர். தாமரை மலரில்
சிவபெருமான் மேவுவர், பசிய மகரந்தமுடைய நீலோற்பல மலரில்
உமையம்மையார் விரும்பி உறைவர்.

     மேன்மை பொருந்திய நறுமணப் பூக்கள் எவற்றிலும் உமையம்மையார்
உவந்துறைவர் ஆகலின் இத்தகைய மலர்களையும் தழைகளையும்
வாய்த்தவற்றைக் கொண்டு அடிமலரில் அருச்சித்தற்குத் திருவேகம்பப்
பெருமான் பேரருள் சுரக்கும், மலரணிதற்குரிய திருத்தோளில் மாலை
தொடுத்துச் சாத்துதல்,

     முற்கூறிய முறையினும் மிக்குப் பயன் தரும். தாமரை மலராலும்
எவற்றினும் சிறந்த நீலோற்பல மலரானும் உயர்வுற ஆயிரம் மலர்களால்
மாலை தொடுத்துப் பெருமானார்க்கும் பெருமாட்டியார்க்கும் சாத்தினால்
பிறவி நோயை முற்றும் கெடுத்து முத்தியையே வழங்கும்.

     திருவேகம்பப் பெருமான் திருமுன்னர் மணமிகும் நெய் தீபமும்,
நறும் புகையும் பணிபுரிந்தால் நறுமணங்கமழும் ஒளியுடைய உடம்பினராய்க்
கயிலையை அடைந்து அருளுடைய பரமானந்தத்தில் மூழ்கி வாழ்வார்.