தேனைத் துளிக்கின்ற சோலைகள் சூழ்ந்த திருவேகம்பத்தில்
கிருட்டினபக்கத்து வரும் அட்டமி சதுர்த்தசி தினங்களில் அன்பு பெருகிப்
பேரழகுடைய கபிலை என்னும் பசுவினது நெய்யொடு கலந்த குங்கிலியத்
தூபம் புகைத்தவர் செய்த பிழைகள் ஆயிரமும் பொறுப்பர் எம்பெருமானார்.

     வடித்த நீரில் பச்சைக் கருப்பூரம் முதலாம் நறுமணப் பொருள்
களிட்டுப் பெருமானார்க்குத் திருமுழுக் காட்டினால் உலகில் ஆயிரம்
அசுவமேதம் செய்த பயனை அது வழங்கும். மணங்கமழும் எள்ளின் நெய்,
பசுநெய், மணமுடைய பஞ்சாமிர்தம், வழிபாட்டிற்குரிய பஞ்சகௌவியம் என்ற
இவை ஒன்றனைவிட ஒன்று ஏற்றமுடையதாகும்.

     செறிந்த மெய்யன்பொடும் பசுப்பாலைத் திருமுழுக்காட்டுவோர்
திறத்தில் தேவதேவனார் மேலுமேலும் அளவுபடாத மகிழ்ச்சி யுறுவர்.
இறுகிய தயிரும், கருப்பஞ்சாறும், செவ்விய தேனும் பிறவும் கொண்டு
அபிடேகம் செய்யின் அளவிறந்த வேள்விகள் அனைத்தும் செய்த பெரும்
பயன்கள் கைகூடும்.

     மந்திரத்துடன் திரு ஒற்றாடைகொண்டு ஈரம் புலர்த்திக் கத்தூரியும்,
பச்சைக் கருப்பூரமும் கலந்த சந்தனக் குழம்பை மட்டித்துத் தொண்டு செய்ய
வல்லவர் தம் மரபின் வந்த முன்னர் பாவப்பயனாக நரகிற் கிடப்பவர் கோடி
என்னும் அளவினரை நரகினின்றும் எடுத்துச் சந்திரசேகரர் திருவடி நிழலில்
வாழ்விப்பவராவார். தாமும் வாழ்வர்.