நுண்ணிய நூலான் அமைந்த துகிலும், வெள்ளிய நுரையை ஒக்கும்
மெல்லிய பட்டாடையும், பல தீவுகளினின்றும் வந்த விரும்பத் தக்க
ஆடைகளும் ஆகிய இவற்றைப் பேரன்புடனே மேகம் போலும்
கரியகண்டமுடையவர்க்குச் சாத்தினால் பரசுபாணியர் தம் சிவலோகத்தில்
ஓரோர் நூலிழைக்கும் சொல்லப்பெறும் ஆயிரம் கற்பம் இனிது வாழ்வர்.

     நால்விரலை ஒன்றுபடுத்தித் தொண்ணூற்றாறு முறை சுற்றி அளவு
படுத்தி மூன்று புரியாக ஒவ்வொன்றில் மூன்றமைய முறுக்கிக் கொண்ட
பூணூலைத் தகைமையோ டென்றும் அணியும் மறையவரைத் தரிசித்தால்
குற்றமுடைய புலையரும் மறுமையில் அந்தணராவர்.

     மத்தங்காய் அளவு செம்பொன்னை மணிமுடியிற் சாத்தினாலும்
அவரடையும் திருவருட் செல்வத்தை ஆயிரம் நாவுடைய ஆதிசேடனாலும்
சொல்ல இயலா ஆகும். பெருஞ்செல்வர் கோடி அளவாகச் செம்பொன்
வழங்கினாலும் வறியவர் சிறிதே ஆரவாரமின்றி உண்மை அன்பொடும்
வழங்குவராயின் அதற்கு அச்செல்வர் பொருள் ஒப்பாகாது தாழும்.

     மணங்கமழும் முடிமாலையும், மணங்கமழும் தூபமும் தீபமும்
அறுவகைச் சுவையுடைய போனகமும், தாம்பூலமும், மேலும் சிறந்த குடையும்,
கவரியும் பூசனைக்கு வேண்டும் பிறவும் முதிர்ந்த பேரன்பொடும் எமது
பெருமானார்க்கு உரிமை ஆக்குவோர் சீவன் முத்தராவார்.