ஞானம் எனும் நாற்பாதங்களின் வழி ஒழுகித் திருவருளைப் பெற்ற ஆதி
சைவர் முதல் அவாந்தர சைவர் அடங்கச் சைவர் யாவரும் தத்தமக்குரிய
இடங்களிற் பொருந்தி வாழ்தற்கிடனாகிய மாடமாளிகை வரிசைகள் சுற்றிச்
சூழ்ந்துயர்ந்த அழகுடைய தாகும்.

     மலம் நித்தியப் பொருளாகலின் அதன் வலியை என்க. சிவாகமம்;
காமிக முதலிய இருபத்தெட்டும்.

திருமதில்

கலிவிருத்தம்

     செயல் முற்றுப்பெற்ற மதில்மேலுள்ள இடப வரிசை, விண்ணுலகு
பெரிதும் அழியும்படி உயர்கின்ற மதிலின் செருக்கை அடக்கும் பொருட்டுச்
சிவபிரானுடைய கட்டளையால் திமிலுடைய இடபம் அங்கு வந்து
அளவில்லாத வடிவு கொண்டு வளராதபடி அழுத்துகின்ற இயல்பினை
ஒத்துளது.

திருக் கோபுரம்

     நவக்கிரகங்களும் உலாவித் தங்குதற்கு ஒன்பது மாளிகைகள் அங்கு
அடுக்காகச் செய்தாற் போல ஒன்பது வகை மணிகள் கொண்டியற்றப்பட்ட
ஒளிமிகுந்த ஒன்பது நிலைகளைத் தழுவிக் கோபுரம் உயர்ந்து தோன்றும்.

     கரியமேகம் ஆடையாகவும், சூரியன் மார்பின் மணியாகவும் பூரணச்
சந்திரன் அழகிய நெற்றியிலணியப் பெற்ற விபூதி ஆகவும் கொண்டு
செல்வச் சிறப்பினையுடைய கோபுரம் உலகரால் புகழப்பெறும் ஓராடவர்
போல உயர்ந்து ஓங்கும் இயல்பினது. விபூதி-சிறந்த செல்வம்.