(இ-ள்.) ஒட்டகம்  - ஒட்டையும், கழுதை - கழுதையும், நாய் -
நாயும், பாம்பு - ஸர்ப்பமும், வாசி - குதிரையுமாகிய இவைகளினுடைய,
ஊன்  -  மாமிசங்களை,  இட்டதோர் - போட்டு நாற்றமெடுத்ததாகிய
ஒரு,    குழியின்     -    குழியைக்     காட்டிலும், மிக்கெழுந்து -
அதிகமாகக்கிளம்பி, நாறிடும் - நாறும்படியான, மட்டிடை - நரகத்தில்,
வீழ்ந்து   -    விழுந்து, அதிலமைந்த - அதிலிருக்கும் ஆவாஸத்தில்
பொருந்திய,    யாக்கையான்   - சரீரத்தையுடையவனாகி, சுட்டதோர்
பனைத்துணிப்போல - கொளுத்தப்பட்ட ஒரு பனங்கட்டையைப்போல,
(அதிகக் கறுப்பு   நிறத்தையுடைத்தாய்), தூங்கினான் - தொங்கினான்,
எ-று.                                                  (61)

515. முடையுடம் பதுவொரு மூழ்த்த மேகலும்
    படைமிடை பூமிமேற் பதித்த போழ்தினே
    தடியொடு தண்டுவா ளேந்திச் சூழ்ந்திடாக்
    கடையற வதுக்கினார் காள மேனியார்.

     (இ-ள்.)  முடை    -    துர்க்கந்தத்தையுடைய,     உடம்பு -
(ஆவாஸத்தில் பொருந்திய) அந்நரக சரீரமானது, ஒரு மூழ்த்தமேகலும்
- ஒரு   அந்தர்    முகூர்த்தம்    சென்ற    காலத்தில்,    படை -
ஆயுதங்களினால்,   மிடை   - நெருங்கிய, பூமிமேல் - நரக பூமியில்,
பதித்தபோழ்தின்  -  அழுத்திய காலத்தில், காளமேனியார் - கறுப்புச்
சரீரத்தையுடைய  புராதன   நாரகர்கள், தடியொடு - கோல்களுடனே,
தண்டு    -   தண்டாயுதங்களையும்,   வாள்    -   வாள் முதலான
வாயுதங்களையும்,  ஏந்தி - கையில் தரித்து, சூழ்ந்திடா - இந்த நூதன
நாரகனைச்  சூழ்ந்துகொண்டு,   கடையற - இவனது சரீரம் அடியற்று
நீங்கும்படியாக, அதுக்கினார் - அடித்தார்கள், எ-று.            (62)

516. திரித்தனர் செக்குர லுட்பெ யர்ச்சியி
    லுரித்தனர் கிழிகளை யொப்பச் சுற்றிடா
    வெரித்தனர் நிறைத்தமுள் ளிலவ மேற்றிநின்
    றுரைத்தன ரெதிரெதிர் வளைந்த முள்ளின்மேல்.

     (இ-ள்.) செக்குரலுள்    -    உரல்போன்று     கல்லாலாகிய
செக்கினுளிட்டு,    பெயர்ச்சியில் - ஆட்டுதலால், திரித்தனர் - (சரீரம்
நசுங்கும்படியாக)    சுற்றி    அரைத்தார்கள்,    கிழிகளையொப்ப -
துணித்துண்டுகளுக்குச்  சமானமாக, உரித்தனர் - (சரீர முழுதிலுமுள்ள
மேற்   சதையை)   கிழித்தார்கள்,   சுற்றிடா - எப்பக்கத்திலும் சுற்றி,
எரித்தனர் -அக்கினியை உண்டுபண்ணிக் கொளுத்தினார்கள், நிறைத்த
- நெருக்கிவைத்த,   முள்ளிலவமேற்றி  நின்று - முள்ளிலவமரத்திலே
ஏற்றி நின்று, எதிர் எதிர் - ஒன்றுக்கொன்று எதிரெதிராக, வளைந்த -
வளைந்து கூர்மையாகிய,   முள்ளின்   மேல் - முள்ளுகளின் மேலே,
உரைத்தனர் - தேய்த்தார்கள், எ-று.                         (63)