366. வேபியா பசியின் வாடி விழுமுயிர்க் கீயக் கண்டு
     கோபியா வஞ்ச நெஞ்சிற் கருணையொன்றின்றிச் செத்துந்
     தீபியாப் பிறந்து நின்று மகனையுந் தின்ற விந்தப்
     பாபியைப் போல கில்லார்க் கருணையைப் பயில்கை நன்றே.

   (இ-ள்.)   வேபியா  -   வருத்துகின்ற  (சுடுகின்ற),  பசியின்  -
பசியினால்,   வாடி - வாட்டமுற்று, விழும் - சோர்கின்ற, உயிர்க்கு -
(வறுமையுற்ற)  ஜீவர்களுக்கு,  ஈய -  (வேண்டியவற்றைக்)  கொடுக்க,
கண்டு  -  அதைப்  பார்த்து,  கோபியா - மிகுதியான குரோதமுற்று,
வஞ்சம் - கபடத்துவமுடைய,நெஞ்சில் - மனதில், கருணை ஒன்றின்றி
- ஜீவதயை   சிறிதுமில்லாமல்,   செத்தும்  -  இறந்தும்,   தீபியா -
புலியாகி,  பிறந்து  - ஜனித்து,  நின்று - காட்டில் நிலைபெற்றிருந்து,
மகனையும் -   முன்   தனது   குமாரனாகியவனையும்,    தின்ற  -
கொன்றுதின்ற,   இந்தப்   பாபியைப்   போலகில்லார்  -    இந்தப்
பாபிஷ்டியைப்போலாகாதவர்களாய்,  (எல்லோரும்)  கருணையை  -
தயவை,பயில்கை - சேர்ந்திருத்தல்,நன்று - நல்லதாகும், எ-று. (10)

 367. பிறவிக ளனந்தந் தம்மிற் பெற்றதாய்ச் சுற்ற மல்லால்
     உறவிக ளொன்று மில்லை யூனினை யுண்டு வாழ்வார்
     மறமலி மனத்த ராய்த்தம் மக்களைத் தின்கின் றாரென்
     றிறைவனை யிவ ளுரைத்தாளின்றுதன் மகனைத்தின்றாள்.

    (இ-ள்.) பிறவிகள் - பிறப்புக்களானவை, (அநாதியாக உண்டாகி),
அனந்தம்    -   முடிவில்லாதனவா   யிருக்கின்றன    (அதாவது :
இதுவரையில் இத்தனை  ஜன்மமெடுத்தோமென்னும்  கணக்கில்லாமல்
இராநின்றன), தம்மில் -  அவைகளில்,  (ஆராய்ந்து  பார்க்குமிடத்து),
பெற்ற  -  ஈன்ற,   தாய்  -   அன்னையாகிய,   சுற்றமல்லால்  -
பந்துவல்லாமல், உறவிகளொன்றும் - யாதொரு ஜீவனும்,  இல்லை -
இவ்வுலகில் இல்லாதனவாகும், (அப்படியிருப்பதனாலே),  ஊனினை -
மாமிசத்தை, உண்டு - புசித்து, வாழ்வார் - வாழ்கின்றவர்கள், மறமலி
-  பாபத்தினால்  நிறைந்த,  மனத்தராய் - மனத்தையுடையவர்களாய்,
தம் -  தங்களுடைய, மக்களை - பிள்ளைகளை, தின்கின்றாரென்று -
தின்னுகிறார்களென்று,  இறைவனை -  சர்வக்ஞனால் சொல்லப்பட்ட
சாஸ்திரத்தை,  இவள்  - இந்த ஸு மித்திரையானவள், உரைத்தாள் -
முன்னே சொன்னாள், (அப்படிச் சொல்லியும்), இன்று - இப்பொழுது,
தன் -  தன்னுடைய,  மகனை  -  குமாரனை,  தின்றாள்  -  தானே
புலியாகிப்  பிறந்து  தின்றுவிட்டாள்,  (சாஸ்திரம்  தெரிந்தும் இப்படி
ஆய்விட்டாள்  என்றபடி), எ-று.

     இறைவன் - என்பது ஆகுபெயராய் இறைவனால்  செய்யப்பட்ட
சாஸ்திரத்தை  உணர்த்திற்று.  இறைவளை  என்றும் பாடபேதமுண்டு;
அங்ஙனங்கொள்ளின் அதற்குத் தக்கபடி பொருளுரைத்துக் கொள்க.
(11)