அரசன் நகருக்குத் திரும்புதல்.

 108. எழுதரு பருதி முன்ன ரிறைஞ்சிய  கமலம்   போலத்
     தொழுதெதிர் முழுதுங் கேட்டுப் போய்நகர்த் துன்னிச் சுற்ற
     முழுதையு மழைத்து முத்திக் கரசனாய் முயல்வ னென்று
     பழுதிலாப்  புதல்வன்  றன்மேற்  பாரைவைத்  தினைய சொன்னான்.

   (இ-ள்.)   எழுதரு   -    உதயமாகிய,   பருதிமுன்னர்    -
சூரியனுக்கெதிரிலே, இறைஞ்சிய - மலர்ந்து வணங்கிய, கமலம்போல
- தாமரைப்பூப் போல, எதிர் - ஸ்வயம்பு நாமதீர்த்தங்கரருக்கெதிரில்,
தொழுது -   (வைஜயந்த   மகாராஜன்)   வணங்கி,   முழுதும்  -
ஜீவாதிபதார்த்தங்கள்  முழுதும்,  கேட்டு  - அவர் சொல்லக்கேட்டு,
போய்  -  அங்கு  நின்றுபோகி, நகர் - நகரத்தில், துன்னி - (தனது
அரண்மனையைச் )       சேர்ந்து,       சுற்றமுழுதையும்      -
பந்துக்களனைவரையும்,   அழைத்து  -  (சமீபத்தில்)  வரவழைத்து,
முத்திக்கு  -  மோக்ஷத்திற்கு, அரசனாய் - எஜமானாக, முயல்வன் -
(இனிதபத்தில்)  முயற்சி  செய்வேன்,  என்று  -  என்று  தெரிவித்து,
பழுதிலா  - குற்றமில்லாத, புதல்வன்றன்மேல் - ஜேஷ்டபுத்திரனாகிய
சஞ்சயந்தன்மேல்,  பாரை  -  இந்த  பூமி  ராஜ்யத்தை,  வைத்து  -
ஸ்தாபித்து,  இனைய  - இத்தன்மையானவைகளை (பின் பாடல்களில்
வரும் விஷயங்களை),சொன்னான் - அந்தக் குமாரனுக்குக் கூறினான்,
எ-று.                                                 (108)

 109. இளமையு மெழிலும் வானத் திடுவிலி னீண்ட மாயும்
    வளமையுங் கிளையும் வாரிப் புதியதன் வரவு போலும்
    வெளியிடை விளக்கின் வீயு மாயுவு மென்று வீட்டுக்
    குளபக லூக்கஞ் செய்வா ருணர்வினாற் பெரிய நீரார்.

    (இ-ள்.)  உணர்வினால்   -   ஞானத்தினால்,   பெரியநீரார்  -
பெரியதாகிய  குணவந்தர்கள்,  இளமையும்  - பால்யமும், எழிலும் -
அழகும்,  வானத்து  -  ஆகாயத்தில்,  இடு -  இடப்பட்ட, நீண்ட -
நீட்சியாகிய,   வில்லின்   -   இந்திர   தனுஸைப்போல,  மாயும் -
நிலையின்றிக்கெடும்,   வளமையும்   -   வளப்பமாகிய  செல்வமும்,
கிளையும்  -  பந்துத்  தன்மையும்,  வாரிப்புதியதன் வரவு போலும் -
மழையினால்  வரப்பட்ட   புது வெள்ளத்துக்கு ஒப்பாகும், ஆயுவும்-
ஆயுஷ்யமும்,  வெளியிடை  -  (காற்றின் மறைவில்லாத) வெளியிலே
வைக்கப்பட்ட,     விளக்கின்    -   தீபத்தைப்போல்,   மாயும்  -
மாய்ந்துபோகும், என்று - (இவ்வாறு ஸம்ஸார ஸ்வரூபம் அனித்தியம்)
என்று   நினைத்து,   உளபகல்  -  தங்களுக்குண்டாகிய  ஆயுஷ்ய
நாளுக்குள்ளே,    வீட்டு  - மோட்சத்திற்கு,  ஊக்கம்   செய்வார் -
(ஸர்வசங்க பரித்தியாகமாகிற தபசைக்கொண்டு சுத்தோபயோகத்திற்கு)
முயற்சி செய்வார்கள், எ-று.                              (109)