கிருஷ்ணன் தலையிலே ஏறிட்டுச் சொல்லுகிறார் என்றலுமாம் இனி, ¹சாந்து கொடுத்த கூனிதன்னையே சொல்லிற்றாய், வருத்தம் அறச் சுண்டுவில் நிமிர்க்குமாறு போன்று கூனை நிமிர்த்தவன் என்றலும் ஒன்று. ‘தெறித்தாய், நிமிர்த்தாய்’ என்றபடி. ‘ஆயின், கிருஷ்ணனுக்கு வில் உண்டோ?’ என்னில், ²வேலிக்கோல் வெட்டி விளையாட்டு வில் ஏற்றித் திரியுமவன் அன்றோ கிருஷ்ணன்? ³‘தருமம் அறியாக் குறும்பனைத் தன்கைச் சார்ங்க மதுவேபோல்’ என்று வில் உண்டாகவே அருளிச்செய்து வைத்தாள் அன்றே ஸ்ரீ ஆண்டாள்? அவள் அருகில் இல்லாது ஒழியினும் உன்னைக் கிட்டினார்க்குத் தாழ்வு வருமோ என்கிறார் இதனால். கோவிந்தா-விலங்குகளோடும் பொருந்துமவன் அல்லையோ நீ?

    வான் ஆர் சோதி மணி வண்ணா-குப்பியில் மாணிக்கம் போன்று ⁴திரிபாத்விபூதியிலும் அடங்காதே விம்மும்படியான புகழ் படைத்த வடிவையுடையவனே! இதனால், ⁵‘அடியார்களுக்காகவே வடிவு படைத்தவன் அல்லையோ நீ?’ என்கிறார். மதுசூதா-மதுவாகிற அசுரனைப் போக்கியது போன்று என் விரோதியைப் போக்கினவனே! இதனால், ‘அவ்வடிவை அனுபவிப்பார்க்கு வரும் விரோதியைப் போக்குவாயும் நீயன்றோ?’ என்கிறார். உன் தேனே மலரும் திருப்பாதம் - ‘இவை ஒன்றும் இல்லையாயினும் அடியில் உன் இனிமையைப் பார்த்தால்தான் விடப் போமோ?’ என்கிறார். தேன் போலே இனிமையான திருவடிகள் என்றபடி. இனி, இவர் ⁶பெருநிலம் கடந்த நல்லடிப்போதையன்றோ ஆசைப்பட்டார்? இவர்

1. கூனி சந்தனம் கொடுத்தது, கிருஷ்ணாவதாரத்தில். சாந்து கொடுத்த
  கூனியின் வளைவை நிமிர்த்த சரிதத்தைப் பாகவதத்தால் உணர்க

2. பெரியாழ்வார் திருமொழி, 2. 6 : 1.

3. நாய்ச்சியார் திருமொழி, 14 : 6.

4. திரிபாத் விபூதி-பரமபதம். இவ்வுலகங்கள் எல்லாம் காற்பங்காகவும்
  அவ்வுலகம் முக்காற்பங்காகவும் இருப்பதனால் பரமபதத்தைத் ‘திரிபாத்
  விபூதி’ என்கிறார்.

5. ஜிதந்தா ஸ்தோத்திரம், 5.

6. திருவாய், 1. 3 : 10.