வி-கு : கோணை - மிறுக்கு; அதாவது, வருத்தம். ‘எம்பெம்மானைக் கூறுதல் கோணை பெரிதுடைத்து,’ என மாற்றுக. பெம்மான் என்பது பெருமான் என்ற சொல்லின் திரிபு.

    ஈடு : பத்தாம் பாட்டு. ‘என்னோடு கலந்த எம்பெருமான் படி ¹பேசப் பெரிதும் மிறுக்குடைத்து,’ என்கிறார்.

    ஆண் அல்லன் பெண் அல்லன் அல்லா அலியும் அல்லன் - நாட்டில் காண்கிற ஆண்களின்படியும் அல்லன், பெண்களின்படியும் அல்லன், உபயோகத்திற்குத் தகுதியில்லாத அலியின்படியும் அல்லன். பட்டர் இவ்விடத்தில், ²‘பரமாத்துமாவைப் பற்றிப் பேசும் ஒருவன் தனது வாக்கால் இப்பரம்பொருளைப் பெண் என்றும் சொல்லுகிறான் இல்லை; ஆண் என்றும் சொல்லுகிறான் இல்லை; இவ்விருபாலுக்கும் வேறான அலியாகவும் சொல்லுகிறான் இல்லை. அத்தகைய பரம்பொருள் அகாரவாச்சியனாய் இருக்கின்றான்’; ³‘அப் பரம்பொருள், தேவன் அசுரன் மனிதன் விலங்கு இவைகளாய் இல்லை; பெண்ணாகவும் இல்லை; அலியாகவும் இல்லை; ஆணாகவும் இல்லை; வேறுபட்ட மற்றைப் பொருள்களாகவும் இல்லை; குணமாக இல்லை; கிரியையாக இல்லை; சேதனனுமாக இல்லை; அசேதனனுமாக இல்லை,’ என்னும் இவ்வேத புராண வாக்கியங்களை மேற்கோள் காட்டி அருளிச்செய்தவாறே, அருகு இருந்து கேட்டிருந்த ஒரு தமிழ்ப்புலவர், ‘சுவாமி, நாட்டில் காணப்படுகின்ற மூன்றின்படியும் அல்லனாகில், சொல்லப்படுகின்ற பொருள் சூன்யமோ பின்னை?’ என்று கேட்க, பட்டர், ⁴‘பிள்ளை இயல் அறிவுக்குப் போந்திருந்தது இல்லையே! ‘ஆணல்லன் பெண்ணல்லள் அலியும் அல்லது’ என்றார் இலரே? ‘அல்லன், அல்லன், அல்லன்’ என்கிறார். ஆதலின் ‘புருஷோத்தமன்’ என்பதனை அச்சொற்கள் தாமே தோற்றுவிக்கின்றனவே?’ என்று அருளிச்செய்தார். ‘ஆணல்லன்

_____________________________________________________________

1. ’பேருமோர் ஆயிரம் பிற பல உடைய எம்பெருமான், பேறு மோர் உருவமும் உளது
  இல்லை இலது இல்லை பிணக்கே’ என்றார் முன்னும். 1. 3 : 4.

2. ருக்வேதம், ஆர. 2 : 2.

3. பாகவதம், 8. 3 : 24.

4. இயலறிவுக்கு - சொல் இலக்கணத்துக்கு. ‘அர்த்தஞானமே அன்றிச் சப்த ஞானமும்
  இல்லையே!’ என்றபடி.

  ‘ஐயந் திணைபால் அவ்வப் பொதுவினும்
  மெய்தெரி பொருண்மேன் அண்மையும் விளம்புப’

  என்பது நன்னூல்.