பொ-ரை : ‘தன்னை உண்டாக்கிய உந்தியோடு பொருந்தி உலகத்தை எல்லாம் படைக்கின்ற பிரமனும் ஆவான்; திருமேனியில் வலப்பாகத்தில் பொருந்தி உலகங்களை எல்லாம் அழிக்கின்ற சிவனும் ஆவான்; தனது திருமார்வில் சேர்க்கப்பட்ட பெரிய பிராட்டியாரை உடையனாய்த் தனக்குத் தகுதியான செயலை உடையனாய் இருக்கிற எம்பெருமானுடைய பெரிய காரியங்கள் எங்கும் காணக் கூடியனவாய் இருக்கும்’ என்றவாறு.

    வி-கு : ‘தன் புணர்த்த உந்தியோடு மன்னிப்புணர்க்கும் அயன் ஆம்; ஆகத்து மன்னி அழிக்கும் அரன் ஆம்; தன் மார்வில் புணர்த்த திரு ஆகி, தான் சேர் புணர்ப்பன் பெரும்புணர்ப்பு எங்கும் புலன்’ எனக் கூட்டுக. மூன்றாமடியிலுள்ள புணர்த்தல் - சேர்த்தல். புணர்ப்பன் செயலையுடையவன். புணர்ப்பு - செயல்.

    ஈடு : மூன்றாம் பாட்டு. ¹‘இருவர் அவர் முதலும் தானே’ என்கிற பதங்களை விவரியாநின்றுகொண்டு, ‘திருமகள் கேள்வனுடைய அதிமாநுஷ சேஷ்டிதங்களை எங்கும் பார்க்கலாம்’ என்கிறார்.

    புணர்க்கும் அயன் ஆம் - இவற்றைப் படைத்தலையே தொழிலாகக் கொண்டிருக்கிற பிரமனும் ஆம். அழிக்கும் அரன் ஆம் - சுடுதடி போலே இவற்றை அடைய அழித்துக் கொண்டிருக்கிற சிவனும் ஆம். ²‘அந்த நாராயணனால் நன்கு காண்பிக்கப்பட்ட படைத்தல் அழித்தல் என்னும் தொழில்களை உடையவர்களாய்ப் படைத்தல் அழித்தல்களைச் செய்கிறார்கள்’ என்றும், ³‘பிரமனே! உன்னிடத்தில் அந்தாரத்துமாவாய் நின்று சிருஷ்டியைச் செய்யப்போகிறேன்’ என்றும் வருகிறபடியே, அவன் அந்தராத்துமாவாய் நின்று நடத்துவிக்க இவற்றைச் செய்கிறார்கள். புணர்த்த தன் உந்தியோடு மன்னிப் புணர்க்கும் அயன் ஆம் ஆகத்து மன்னி அழிக்கும் அரன் ஆம் - இவைதாம் இவர்கள் செய்ய வல்லராவது அவன் திருமேனியைப் பற்றி இருந்த போதாயிற்று; பால் குடிக்கும் குழந்தை வாயில் முலை வாங்கினால் தரியாதது போன்று, இவர்களும்

_____________________________________________________________

1. ‘ஆகத்து மன்னி’ என்பதனையும், ‘புணர்த்த திரு ஆகி’ என்றது முதல் ‘எங்கும் புலனே’
  என்றது முடிய உள்ளவற்றையும் நோக்கி அவதாரிகை அருளிச்செய்கிறார்.

  அதிமானுஷ சேஷ்டிதங்கள் - மனிதர்கள் செயல்களுக்கு அப்பாற் பட்ட செயல்கள்.

2. பாரதம், சாந்தி பர்வம், 169.

3. விஷ்ணு தர்மம்.