இனி, ¹பகவானுடைய பிரிவிலே உட்புக நின்றால் அன்றோ பாகவத விஸ்லேஷந்தான் தெரிவது?²’இலக்குமணா! மகாத்துவமாவான பரதனோடும், வீரனான சத்துருக்கனனோடும், உன்னோடும் எப்பொழுது சேர்வேன்?’ என்கிறார் பெருமாள். இங்கு, ஸ்ரீபரதாழ்வானோடும் சத்துருக்கனாழ்வானோடும் கூடப்பெறாத ³கிழிக்குறையாலே, கூட நிற்கிற இளைய பெருமாளோடும் கூடிற்றாய்த் தோன்றவில்லை பெருமாளுக்கு; ⁴‘ஸ்ரீராபிரான், குகனைச் சேர்ந்தார்; அதனால், இலக்குமணனோடும் பிராட்டியோடும் சேர்ந்தவரானார்’ என்கிறார் வால்மீகி. இங்கு, கூடப்போன இளையபெருமாளோடும் பிராட்டியோடும் கூடிற்றாய்த் தோன்றியது, ⁵ஸ்ரீகுகப்பெருமாளோடு கூடின பின்பு அன்றோ? இப்படியே அன்றோ இறைவன் தனக்கும் ⁶அந்வய வியதிரேகங்கள் இருக்கும்படி. ஆக, அடியார்களுடைய சேர்க்கையை ஆசைப்பட்டுப் பெறாமையாலே வந்த இழவு, பெற்ற பகவானுடைய சேர்க்கையையும் இழந்து அடியே பிடித்துப் பிரார்த்திக்க வேண்டும் படியாய் வந்து விழுந்தது எனக் கோடலுமாம்.

_____________________________________________________________

1. ‘பகவானுடைய பிரிவிலே உட்புக நின்றால் அன்றோ பாகவத விஸ்லேஷந்தான்
  தெரிவது?’ என்றது, பாகவதர்களுடைய பிரவின் விசயனமிகுதி தெரிவது; பெற்ற
  பகவானுடைய சேர்க்கையும் போய் அதுவும் பிரார்த்திக்கும்படி உட்புக நின்றாலிறே;
  இல்லையாகில், உட்புக நின்றவராகையாலே, அது, இவர்க்குப் பகவத்
  விஸ்லேஷபர்யந்தமாய், அவன் தன்னை அடியே பிடித்துக் கூப்பிடுகிறார் என்றவாறு.
  விஸ்லேஷம் - பிரிவு. ‘ஆயின், பெற்றது பெறாததாகத் தோன்றுமோ?’ எனின், அதனை
  இரண்டு உதாரணமுகத்தால் விளக்குகிறார் மேல்.

2. ஸ்ரீராமா. ஆரண். 16 : 10.

3. கிழிக்குறை - நிறைந்திராமல் குறைந்திருக்கிற பணப்பை. கிழி - பணப்பை. ‘வேண்டிய,
  வேதங்கள் ஒதி விரைந்து ‘கிழி அறுத்தான்’ என்ற இடத்துக் ‘கிழி’ என்பது இப்பொருட்டு.

4. ஸ்ரீராமா. பால. 1 : 29

5. வேடர் தலைவனான குகனை. ‘குகப்பெருமாள்’ என்பது வைணவப் பெருமக்கள் வழக்கு.

6. ‘அந்வய வியதிரேகங்கள்’ என்பதற்குப் பொருள்: - ‘எது இருந்தால் எது இருக்குமோ,
  எது இன்றேல் எது இராதோ’ என்பது. ‘யத்சத்வே யத் சத்வம்; யதபாவே யதபாவ:’
  என்பது வடமொழி வாக்கியம். இங்கு, ஸ்ரீராமபிரானுக்கு ஸ்ரீ குகப்பெருமாளுடைய
  சேர்க்கை உண்டானதனால் இளையபெருமாளோடும் பிராட்டியோடும் சேர்ந்த
  சேர்க்கையையும் அவர் உள்ளவரானார். ஸ்ரீ பரதாழ்வான சத்துருக்கனாழ்வான்
  இவர்களுடைய சேர்க்கை இல்லாததனால், இளையபெருமாளுடைய சேர்க்கை இருந்தும்
  அவர் இல்லாதவரானார் என்க.