ஈடு : ஐந்தாம் பாட்டு. ¹‘அடியார்களுடைய விரோதிகளை அழிக்கும்பொருட்டு அசாதாரண திவ்ய ரூபத்தோடு கூடினவனாய்க்கொண்டு திருவவதாரம் செய்த குணத்தை அநுசந்தித்தால் உள்ளமும் செயலும் வேறுபடாதார் மக்கள் ஆகார்,’ என்கிறார்.

    சாது சனத்தை நலியும் கஞ்சனைச் சாதிப்பதற்கு - சாது சனத்தை நலிந்த கஞ்சனை அழிக்கைக்காக; ‘சாதுசனம்’ என்றது, ஸ்ரீ வசுதேவரையும் தேவகியாரையும். ‘கஞ்சன் இவர்களை நலிந்தானோ?’ எனின், ²‘தந்தையாக அடைய வேண்டும் என்று நிச்சயித்தார்’ என்று தான் அவதரிக்க நினைத்த இவர்களையன்றோ அவன் நலிந்து நெடுநாள் சிறையிட்டு வைத்தது? ³‘சாதுக்களுடைய நலத்திற்காகவும் துஷ்டர்களுடைய நாசத்திற்காகவும் தர்மத்தை நிலை நிறுத்தும்பொருட்டும் ஒவ்வொரு யுகத்திலும் அவதரிக்கிறேன்’ என்கிற பிரமாணப் பிரசித்தியைப் பற்ற ‘சாது சனத்தை நலியும் கஞ்சனைச் சாதிப்பதற்குப் பிறந்த வேத முதல்வன்’ என்கிறார்.

    ஆதி அம் சோதி உருவை - இவ்வருகு உண்டான காரியவர்க்கத்துக்கு எல்லாம் ஊற்றாய், ஞானம் முதலிய குணங்களுக்குப் பிரகாசகமாய், ‘குணங்களின் கூட்டமே விக்ரஹம்’ என்று மயங்குவார்க்கும் மயங்கலாம்படியேயன்றோ திருமேனிதான் இருப்பது? அங்கு வைத்து இங்குப் பிறந்த - அங்கு இருந்தபடியே வைத்துக்கொண்டு இங்கே வந்து பிறந்த; ⁴‘என்னுடையதான தன்மையை நிலைக்களமாகக் கொண்டு என்னுடைய சங்கற்பத்தினால் அவதரிக்கிறேன்,’ என்றான் ஸ்ரீ கீதையில். ‘நித்திய விபூதியில் உள்ளார் ⁵அனுபவிக்கிறபடியே லீலா விபூதியில் உள்ளாரும்

_____________________________________________________

1. ‘கஞ்சனைச் சாதிப்பதற்கு ஆதி அம் சோதி உருவை அங்கு வைத்து இங்குப்
  பிறந்த வேதமுதல்வனைப் பாடித் துள்ளாதார் மனிசரே?’ என்றதனைக்
  கடாக்ஷித்து அவதாரிகை அருளிச்செய்கிறார். 

2. ஸ்ரீராமா. பாலகாண். 77 : 26.

3. ஸ்ரீகீதை, 4 : 8. இது, ‘சாதுக்களைக் காத்தற்கும் துஷ்டர்களைக்
  கொல்லுதற்கும் அவதரிக்கிறான்,’ என்பதற்குப் பிரமாணம்.

4. ஸ்ரீகீதை, 4 : 6.

5. ‘அனுபவிக்கிற படியே’ என்றது சிலேடை; அனுபவிக்கிற பிரகாரமும்,
  அனுபவிக்கிற திருமேனியும்.