யுடையவனை அன்றோ ஏத்தச் சொல்லுகிறது? உங்களுடைய சேர்க்கையாலே செருக்கியிருக்கிறவனை அன்றோ ஏத்தச் சொல்லுகிறது? ஒரு கால நியதி உண்டாய் இருக்கின்றீர்களோ? ஏத்துகைக்குச் சாதனம் இல்லாதவர்களாய்த்தான் இருக்கின்றீர்களோ? ¹அதில் ஒரு அருமை உண்டாய்த்தான் இருக்கின்றீர்களோ? ஆனபின்னர், விஷயங்களிலே ஓடித்திரிந்த மனத்தினை மீட்டு இவ்விஷயத்திலே வைக்கப் பாருங்கோள்,’ என்கிறார்.

(3)

281

        வைம்மின் நும்மனத்து என்று யான்உரைக்
             கின்ற மாயவன் சீர்மையை
        எம்ம னோர்கள் உரைப்பது என்? அது
             நிற்க; நாடொறும் வானவர்
        தம்மை ஆளு மவனும் நான்முக
             னும்ச டைமுடி அண்ணலும்
        செம்மை யால்அவன் பாத பங்கயம்
             சிந்தித்து ஏத்தித் திரிவரே.

    பொ-ரை : ‘உங்களுடைய மனத்தின்கண் வைம்மின் என்று யான் உரைக்கின்ற மாயவனுடைய சிறப்பினை எம்மைப்போன்றவர்கள் சொல்லுவது என்? அது கிடக்க, தேவர்களை ஆளுகின்ற இந்திரனும் பிரமனும் சிவனும் அன்போடு அம்மாயவனுடைய திருவடித்தாமரைகளைத் தியானித்து ஏத்தித் திரிவார்கள்,’ என்கிறார்.

    வி-கு : ‘வைம்மின்’ என்பதிலுள்ள ஐகாரம், ஒரு மாத்திரையாய் ஒலித்துக் குற்றெழுத்தாய் நின்றது. எம்மனோர் - உளப்பாட்டுத் தன்மைப்பன்மை. ‘செம்மை’ என்பது, ஈண்டு அன்பினைக் குறித்தது. ‘சிந்தித்து ஏத்தித் திரிவர்’ என்றதனால், மனம் வாக்குக் காயங்களைக் கூறியபடி.

    ஈடு : நான்காம் பாட்டு. ²செருக்கு மிக்கவர்களான பிரமன் உருத்திரன் முதலாயினார்கட்கும் தடையின்றிக்கே புக்குப் பற்றும்படியாக இருக்கிற சீலகுணத்தைப் பேசுகிறார்.

_____________________________________________________

1. ‘வைம்மின்’ என்றதனை நோக்கி, ‘அதில் ஓர் அருமையுண்டாய்த்தான்
  இருக்கின்றீர்களோ?’ என்கிறார்.

2. பின் இரண்டு அடிகளைக் கடாக்ஷித்து, அவதாரிகை அருளிச்செய்கிறார்.
  ‘நாடொறும் வானவர்தம்மை ஆளும்’ என்பதிலே நோக்காகச் ‘செருக்கு
  மிக்கவர்களான’ என்கிறார்.