ஆதலின் - ஆன பின்பு, ‘வாழ்வின் நிலையாமை இதுவான பின்பு’ என்றபடி. ஆதி அம் சோதி குணங்கள் கோமின் - எல்லா ஐஸ்வர்யத்திற்கும் அறிகுறியான திருத்துழாய்மாலையைத் திருமுடியிலே உடையனாய், உலக காரணனாய், எல்லை இல்லாத ஒளி உருவமான விக்கிரஹத்தையுடையவனாய் இருந்துள்ளவனுடைய குணங்களைச் சேர்த்து அனுபவியுங்கோள். ¹‘சொரூபத்தைப் பற்றியதாயும் விக்கிரஹத்தைப் பற்றியதாயும் உள்ள கல்யாண குணங்கள்’ என்பார், ‘ஆதி அம் சோதி குணங்கள்’ என்கிறார். ²‘நான் பரமாத்துமாவாகிய இனிய பொருளை அனுபவிக்கிறவன்,’ என்றும், ³‘அவன் எல்லாக் கல்யாண குணங்களையும் பரமாத்துமாவோடு அனுபவிக்கிறான்,’ என்றும், ⁴‘ஓவாத் தொழிற்சார்ங்கன் தொல்சீரை நன்னெஞ்சே, ஓவாத ஊணாக உண்’ என்றும் சொல்லப்படுகின்றவாறே’ அனுபவியுங்கோள்’ என்றவாறு.

(7)

340

        குணங்கொள் நிறைபுகழ் மன்னர்
            கொடைக்கடன் பூண்டிருந்து
        இணங்கி உலகுஉடன் ஆக்கிலும்,
            ஆங்குஅவ னைஇல்லார்
        மணங்கொண்ட போகத்து மன்னியும்
            மீள்வர்கள்; மீள்வுஇல்லை;
        பணங்கொள் அரவணை யான்திரு
            நாமம் படிமினோ.
_____________________________________________________

1. ‘ஆதி’ என்றதனை நோக்கி, ‘சொரூபத்தைப் பற்றியதாயும்’ என்கிறார். ‘அம்
  சோதி’ என்றதனை நோக்கி, ‘விக்கிரஹத்தைப் பற்றியதாயும் என்கிறார்.
  கோமின் - சேர்த்து அனுபவியுங்கோள். கோத்தல் - சேர்த்தல்.

2. தைத்திரீய உப. பிரு. 10. ‘அறுசுவை அடிசிலை விடுத்து, ஆறு
  குணங்களுடைய பகவானாகிற அன்னத்தை உண்ணுங்கோள் என்கிறார்,’
  என்றபடி.

3. ஆனந்த வல்லி, 1 : 2.

4. ‘துணைநாள் பெருங்கிளையும் தொல்குலமும் சுற்றத்
  திணைநாளும் இன்புடைத்தா மேலும் - கணைநாணில்
  ஓவாத் தொழிற்சார்ங்கன் தொல்சீரை நல்நெஞ்சே!
  ஓவாத ஊணாக உண்.’

  என்பது பெரிய திருவந்தாதி, 78.