‘இவைபோல் அன்றிக்கே, ஆத்தும அனுபவம் நிலை நின்ற புருஷார்த்தமே அன்றோ?’ என்னில்,’ ‘மேலே கூறியவற்றை நோக்கும்போது இதற்கு ஒரு நன்மை உண்டேயாகிலும், பகவானுடைய ஆனந்தத்தைப் பார்க்கும்போது இது மிகச் சிறியதாய் இருக்கையாலே இதுவும் தண்ணிது; ஆன பின்பு, அவனைப் பற்றப் பாருங்கோள்,’ என்கிறார்.

    குறுக உணர்வத்தொடு மிக நோக்கி - பல காலம் புறம்பே உள்ள விஷயங்களில் பண்ணிப் போந்த வாசனை அடைய ஆத்துமாவிலேயாம்படி ¹‘விசத தமமாகத் தியானம் செய்து’ என்றது, ‘புறம்பேயுள்ள விஷயங்களிலே தூரப் போய்ப் பற்றுகின்ற மனத்தினை ஆத்துமாவின் பக்கலிலே சேர்த்து’ என்றபடி. இது ²கண்ணை இட்டுக் கண்ணைப் பார்த்தாற்போலே இருப்பது ஒன்று ஆதலின், ³‘குறுக’ என்கிறார். இதனால், முதல் தன்னிலே ஆத்துமாவின் பக்கலிலே சேர்த்திய மனத்தினையுடையவனுக்கே ஆத்தும அனுபவத்தில் அதிகாரம் உள்ளது என்பதனைத் தெரிவித்தபடி. எல்லாம் விட்ட - ⁴திருமகள் கேள்வன் பெரிய திருவடி திருத்தோளிலே தோளும் தோள் மாலையுமாய் வந்து நின்றாலும், சாணகச்சாற்றைப் போன்று சுத்தி மாத்திரத்தையே பற்றிக்கொண்டு, இனிமையிலே நெஞ்சு செல்லாதபடி அதனையும் விடுவது.

    இறுகல் இறப்பு என்னும் ஞானிக்கும் - ⁵சங்கோசத்தை மோக்ஷம் என்று சொல்லுகிற ஆத்தும ஞானிக்கும்.

_____________________________________________________

1. விசததமமாக - விளக்கமாக; மிக நன்றாக.  

2. ‘கண்ணையிட்டுக் கண்ணைப் பார்த்தாற்போலே’ என்றது, தர்மபூத
  ஞானத்தாலே ஞான சொரூபனான ஆத்துமாவைப் பார்த்தலைக் குறித்தபடி.

3. குறுக - குறுக்கி; சேர்த்து.

4. ‘எல்லாம் விட்ட’ என்றது, ஆத்துமாவிற்கு வேறுபட்ட
  பொருள்களையெல்லாம் விடுதலைத் தெரிவித்தபடி. ‘திருமகள் கேள்வன்’
  என்று தொடங்கும் வாக்கியம், எல்லாம் விடுதலின் முடிவு எல்லை.
  சாணகச்சாறு - பஞ்ச கவ்யம்.

5. சங்கோசமாவது, சர்வேசுவரன் அளவும் போகாமல் அணு அளவான
  ஆத்தும மாத்திரத்திலேயே முடிவாக நிற்றல்.