ஆன்கன்று மேய்த்தேனும் யானே என்னும் - ¹“கன்றுகளின் நடுவில் உள்ளவனும் இளமைப்பருவமுடையவனும்” என்கிறபடியே, என்னோடு ஒத்த பருவமுள்ள கன்றுகளை மேய்த்தேனும் நான் என்னும். இன ஆநிரை காத்தேனும் யானே என்னும் - முன்பு பிரஹ்மசர்யம் அநுஷ்டித்துப் பின்பு இல்லற தர்மம் அநுஷ்டிப்பாரைப் போலே, இளமைப் பருவத்தில் கன்றுகளை மேய்த்து, பருவம் நிரம்பின பின்பு பசுக்களை மேய்த்தேனும் நான் என்னும். இன ஆயர் தலைவனும் யானே என்னும் - ²“தன்னேராயிரம் பிள்ளைகள்” என்கிறபடியே என்னோடு ஒத்த பருவத்தில் பிள்ளைகளும் நானுமாகத் தீம்பு செய்து திரிகிற இடத்தில் அவர்களில் என்னளவு தீம்பு செய்கின்றவர்கள் இலர் என்னும். இனத்தேவர் தலைவன் வந்து ஏறக்கொலோ-வேறு ஒன்றிலும் விருப்பம் இல்லாதிருத்தலுக்குத் தன்னோடு ஒத்திருக்கிற நித்தியசூரிகளுக்கு நிர்வாஹகனான சர்வேச்வரன் வந்து ஆவேசித்தானோ? அன்றிக்கே, இனத்தேவர் என்பதற்கு, தனியே அநுபவிக்க ஒண்ணாமையாலே திரள்திரளாக இருக்கிற நித்தியசூரிகள் என்னுதல். ³“அடியார்கள் குழாங்கள்” என்னக்கடவதன்றோ. இனம் வேல் கண் நல்லீர்க்கு இவை என் சொல்லுகேன் - இவள் நிலை எவ்வளவாய்த் தலைக்கட்டுகிறது என்று, வேல் ஒழுங்கு போலே கூர்க்கப் பார்த்துக்கொண்டிருக்கிற உங்களுக்கு நான் எதனைச் சொல்லுவேன்? ஏன் தான், சொல்ல அருமை என்? என்ன, இனம் வேல் கண்ணி என்மகள் உற்றன-தன் கண்களுக்கு இலக்கானார் படுமதனைத் தான் படுகிறபடியைச் சொல்லப் போமோ? ⁴“உயிர்காமின்கள் ஞாலத்துள்ளே” என்பதே அன்றோ இவள் கண்களுக்கு இலக்கானார் படுவது.

(6)

_____________________________________________________

1. “வத்ஸ மத்யகதம் பாலம் நீலோத்பல தளச்சவிம்” என்பது, ஸ்ரீவிஷ்ணுபுரா.
   5. 17 : 19.

2. “தன்னேராயிரம் பிள்ளைகளோடு தளர்நடை இட்டு வருவான்” என்பது,
   பெரியாழ்வார் திருமொழி.

3. திருவாய்மொழி, 2, 3 : 10.

4. “கடாவிய வேகப் பறவையின் பாகன் மதனசெங்கோல்”
   நடாவிய கூற்றம் கண்டீர் உயிர் காமின்கள் ஞாலத்துள்ளே”

  என்பது, திருவிருத்தம் 6.