குழகி எங்கள் குழமணன் கொண்டு கோயின்மை செய்து
                                [கன்மம் ஒன்றில்லை;
    பழகி யாம் இருப்போம் பரமே இத் திருவருள்கள்?
    அழகியார் இவ் வுலகு மூன்றுக்கும் தேவிமை தகுவார் பலருளர்;
    கழகம் ஏறேல், நம்பி! உனக்கும் இளைதே கன்மமே.

    பொ-ரை :- வசீகரித்தற்குரிய செயலைச் செய்து எங்களுடைய குழமணனை எடுத்துக்கொண்டு மேன்மை தோன்றப் பேசுவதனால் ஒரு பயனும் இல்லை; நாங்கள் முன்னரே இவற்றில் பழகி இருக்கின்றோம்; நீ செய்கின்ற இந்தத் திருவருள்கள் எங்கள் அளவேயோ! இந்த மூன்று உலகங்கட்கும் உம்மோடு ஒக்க முடிசூடத் தக்கவர்களாகிய அழகினையுடையவர்கள் பலர் உளர்; நம்பீ! எங்கள் கூட்டத்தில் ஏறாதே; உனக்கும் இது இளைமைப் பருவத்திற்கு உரிய செயலேயாம்.

    வி-கு :- இவ்வுலகு மூன்றுக்கும் தேவிமை தகுவார் அழகியார் பலர் உளர் என்க. குழகுதல்-வசீகரித்தலுக்குரிய செயலைச் செய்தல். குழமணன்-மரப்பாவை. கோயின்மை - பெருமை. அல்லது, செருக்கு. கழகம் - கூட்டம். இளைது - இளமைப் பருவத்திற்குரியது.

    ஈடு :- ஆறாம்பாட்டு. ²தங்கள் மனங்களிலே ஓடுகின்றவற்றைத் தெரியாமல் மறைத்துக்கொண்டு அணுக முடியாதவர்களாயிருக்கிற இந்தப்பிராட்டியையும் தோழிமாரையும் கண்டு, அவன் தன் முகமுத்திரைகளாலும், கருத்துடைய வார்த்தைகளாலும், அதனைத் தொடர்ந்து வருகின்ற இன்பச்செயல்களாலுமாக இவர்கள் எண்ணங்களைக் குலைத்து, இனி இவர்கள், தான் செய்தவை எல்லாம்