கைதவம் செம்மை கருமை வெளுமையுமாய்
        மெய்பொய் இளமை முதுமை புதுமை பழமையுமாய்ச்
        செய்த திண்மதிள் சூழ்திரு விண்ணகர்ச் சேர்ந்தபிரான்
        பெய்த காவு கண்டீர் பெருந்தேவுடை மூவுலகே.

    பொ-ரை :- வஞ்சனையும் நேர்மையுமாகி, கருமையும் வெண்மையுமாகி, மெய்யும் பொய்யுமாகி, இளமையும் முதுமையுமாகி, புதுமையும் பழமையுமாகி, செய்யப்பட்ட திண்ணிய மதிள்களாற் சூழப்பட்ட திருவிண்ணகரம் என்னும் திவ்வியதேசத்தில் நின்ற திருக்கோலமாய் எழுந்தருளியிருக்கின்ற எம்பெருமான் வைத்து வளர்க்கின்ற சோலை காண்மின்; பெரிய தெய்வங்களையுடைய இந்த மூன்று உலகங்களும்.

    வி-கு :- பெருந்தேவுடை மூவுலகு, ஆய், சேர்ந்த பிரான் பெய்த காவு கண்டீர் என்க. கா - சோலை.

    ஈடு :- ஐந்தாம்பாட்டு. ²சிறியார் பெரியார் என்னாதே எல்லார்க்கும் ரக்ஷகன் திருவிண்ணகர் சேர்ந்த பிரான் என்கிறார்.

    கைதவம் செம்மை - வஞ்சனை நேர்மைகள். கருமை வெளுமை - கருப்பு வெளுப்பு. மெய் பொய் - உண்மை இன்மை. இளமை முதுமை - இளமை கிழத்தனம். புதுமை பழமை - புதுமையும் பழமையும். செய்த திண் மதிள் சூழ் திருவிண்ணகர் சேர்ந்த பிரான் - காலம் செல்லச் செய்தேயும் இப்பொழுது செய்தாற்போலே இருக்கிற தொழிலின் புதுமையைச் சொல்லுகிறது. பெய்த காவு கண்டீர் - வைத்து ஆக்கின

1. அர்த்தவாதம் - புனைந்துரை.

2. தேவர்கள் முதலானவர்களையுடைய மூன்று உலகமும் அவன்
  உண்டாக்கின சோலை என்கையாலே தோற்றுகிற கருத்தினை அருளிச்
  செய்கிறார் ‘சிறியார் பெரியார்’ என்று தொடங்கி. 

      “எல்லாமாய்க் கொண்டிருக்கிற திருவிண்ணகர் சேர்ந்த பிரான் பெய்த
  காவு” என்கையாலே, சொரூப ஐக்யம் சொல்லுகிறது அன்று; சாமாநாதி
  கரண்ய நியாயத்தாலே காரிய காரண பாவத்தைச் சொல்லுகிறது.