நீடும் களிறு - முன்னர்க் கண்கட்டி விடப்பட்டபோது திருவருள்
வசமாகித் தம்மை எடுத்துப் பிடரியில் கொண்ட என்று குறிக்க நீடு என்றார்.

     நீள் மறுகு - ஆலவாய்க்கடவுள் பல அருட் டிருவிளையாடல்கள்
செய்த அருளினால் நீளும் திருவீதிகள். இந்நாளிலும் அவை அவ்வருட்டிரு
விளையாடல்களையே (ஆவணி மூல வீதி முதலிய) தத்தம் பெயர்களால்
நினைவூட்டி நிற்பதும் கண்கூடு.

     மௌலியணிந்தவர் என்ற எழுவாய் வினைப்பெயர். 43

     1011. (வி-ரை.) மணிமாளிகை - அரசரது அரண்மனை. தயங்கும்
மணிமண்டபம் - அதனுள் கொலு வீற்றிருக்கும் மண்டபம்.

     பொன்னின் அரி மெல் அணை - பொன்னாற் புனையப்பட்டுச்
சிங்கம் சுமந்தது போல அமைக்கப்பட்டிருக்கும் அரச இருக்கை. மென்மை -
பஞ்சு, தூவி முதலியவற்றை உள்ளே இட்டு, வீற்றிருக்க மெல்லியதாய்ப், பட்டு
முதலியவற்றால் அமைக்கப்படுதல் குறித்தது. Soft cushion என்பர் நவீனர்.

     சாமரைப்பூங்கால் - சாமரைகளை இருபுறமும் மெல்ல வீசுதலால்
உளதாகும் மென்மையாக அசையும் காற்று. காமர் - சாமரைகளின் அழகு -
வரிசையின் ஒழுங்கு - இவற்றையும், பூ - காற்றின் மென்மையினையும்
குறித்தன. நவீனர், மேல் விசிறி (Punka) வீச அதன்கீழ் வீற்றிருக்கும் இயல்பு
காண்க.

     மன்னும் குடைநீழல் - உலகம் தன் கீழ்த்தங்கும் அரச ஆணைக்கு
அடையாளமாகிய வெண்குடையின் நீழலிலே. நீழல் - உபசாரம்.
"வெண்கொற்றக் குடையும், நவமணி முடியும், சிங்காதனமும்,
மன்னவர்க்கேயுரிய சிறப்படையாளமாம்" (சிவஞா - போ - 8-ம் சூ. சிற்றுரை)
என்றது காண்க.

     வையந் தாங்கி இருந்தனர் என்க. தாங்குதல் உபசார வழக்கு.
அரசாளுதல் குறித்தது. "வையம் முறை செய்குவனாகில்" (1008).

     அணை - நீழல் - ஏழனுருபுகள் தொக்கன.

     அணிந்தவர் - சென்று - தாழ்ந்து - போந்தாராகி - இழிந்து - நீழல் -
இருந்தனர் என்று இந்த இரண்டு பாட்டுக்களும் கூட்டி முடித்துக்கொள்க. 44

     1012. (இ-ள்.) வெளிப்படை. குலவுகின்ற பல துறைகளிலும்
நீதிநடத்தும் அமைச்சர்கள் தமதுகுறிப்பின்படி நிற்கவும், கலகம்செய்த
அமணர் செயலாயின கட்டு நீங்கி நிலவுகின்ற திருநீற்று நெறியும் துறையும்
நீடுவாழவும், உலகமெங்கும் நிரம்பிய தன்மையுடைய சைவம் ஓங்கி
நிலைபெறவும், 45

     1013. (இ-ள்.) வெளிப்படை. நெற்றியின் கண் விழியுடையவராகிய
சிவபெருமானது வாய்மையாகிய நுண்பொருள் கொண்ட நூலின் பொருள்
எங்கும் நிறைந்து விளங்கவும், பவங்கள் மாறவும் உதவுகின்ற திருநீறும்,
உயர் உருத்திராக்கக்